Aprelin 1-də İran Prezidentinin siyasi məsələlər üzrə müşaviri Mehdi Sənayi Azərbaycana səfər edib. Onun səfərinin İran Prezidenti Məsud Pezeşkianın Azərbaycana səfəri ilə bağlı olduğu bildirilir. Sənayi Bakıda mühüm görüşlər keçirib.
Modern.az-a açıqlamasında Sənayinin ölkəmizə səfərini şərh edən Azərbaycan-İran Parlamentlərarası İşçi Qrupunun üzvü Ceyhun Məmmədov bildirib ki, belə səfərlər olduqca önəmlidir:
"Bir müddət əvvəl Azərbaycan-İran münasibətlərində gərginlik vardı. Artıq bu gərginlik aradan qaldırılıb. İndi bizim əlaqələrimiz sürətlə inkişaf edir. Bu olduqca önəmli hadisədir. Artıq İran-Azərbaycan münasibətləri yeni bir mərhələyə daxil olub. Nəzərə almalıyıq ki, İran qonşumuzdur və güclü dövlətçilik ənənələrinə sahibdir. Bu gün dünyada çox ciddi proseslər gedir. Geosiyasi vəziyyət heç də yaxşı deyil. Ona görə də biz qonşularımızla münasibətlərimizi gücləndirməliyilk. Son zamanlar Azərbaycan rəsmiləri İrana səfərlər etmişdilər. Yəni biz xatırlayırıq ki, ölkəmizin Baş naziri, Prezidentin xarici məsələlər üzrə köməkçisi Hikmət Hacıyev İranda səfərdə olub. Çox yaxşı, səmərəli görüşlər keçirildi və ikitərəfli əlaqələrin inkişafı ilə bağlı tərəflər arasında əlaqələr yeni mərhələyə daxil olub. O mənada İran Prezidentinin siyasi məsələlər üzrə müşavirinin səfəri çox önəmlidir. O, cənab Prezident İlham Əliyev tərəfindən qəbul edildi, eləcə də Hikmət Hacıyev və xarici işlər naziri Ceyhun Bayramovla görüşdü. İkitərəfli əlaqələrin inkişafı ilə bağlı tərəflər arasında əlaqələr yeni mərhələyə, dövrə daxil olub".
Deputat vurğulayıb ki, əlaqələrin inkişafı həm Azərbaycana, həm də İrana lazımdır:
"Digər görüşlərin də keçirilməsi nəzərdə tutulur. Yəni gələcəkdə İran Prezidenti də Azərbaycana səfər edəcək. Aprel ayında bu səfərin baş tutuması ilə bağlı fikirlər var. Bütün bu məsələlər, addımlar əlaqələrimizin daha da inkişaf etdiyini göstərir. Əlaqələrin inkişafı həm Azərbaycana, həm də İrana lazımdır. Ona görə düşünürəm ki, bu cür əlaqələrin inkişafını yüksək qiymətləndirməliyik. Cənab Prezidentin rəhbərliyi ilə Azərbaycanın xarici siyasətinin növbəti bir uğuru kimi nəzərdən keçirməliyik. Biz inanırıq ki, növbəti mərhələdə əlaqələrimiz daha da inkişaf edib, güclənəcək və aramızdakı fikir ayrılıqları aradan qalxacaq".
