Bəzi məzarlıqların yeri həmin bölgədə sakinlər üçün narahatlıq doğurur. Əhalinin yaşadığı evlərə çox yaxın məsafədə yerləşən qəbiristanlıqlar insanların gündəlik yaşamına da təsir göstərir. Paytaxt ərazisində, bölgələrdə belə məzarlıqlar az deyil. Onları həyətlərin darvazaları ilə çox az məsafə ayırır.

Milli Məclisin Dini qurumlar və ictimai birliklər komitəsinin sədri Fazil Mustafa mövzu ilə bağlı Modern.az saytına açıqlama verib.

Deputat deyib ki, məzarlıqların yaşayış yerinə yaxın salınması əvvəlcədən planlaşdırılmayıb. Ya qəbiristanlılar öncə salınıb, ya da evlər birinci tikilib. Qanunvericilikdə bu məsələni qadağa edən heç bir norma yoxdur. Sadəcə, məzarlıqlarda əhalidən sanitar-gigiyena qaydalarına əməl olunması tələb olunur. Bu səlahiyyət də bələdiyyələrə verilib.

Komitə sədri vurğulayıb ki, bəzi bələdiyyələrin də qəbiristanlıqları təmiz saxlamağa, orada qayda-qanun yaratmağa imkanları çatmır. Nəticədə məzarlıqlar nəzarətsiz qalıb. Hətta bəzi qəbiristanlıqlarda yerlər də dolub.

Fazil Mustafa qeyd edib ki, ümumilikdə, məzarlıqlarda problemlər bununla bitmir.

“Bizim məsələnin həlli yolunda konkret cavab verməyimiz asan deyil. Məsələ ilə bağlı bir neçə dəfə müzakirələr aparılsa belə, həlli yolunda addım atmaq mümkün olmayıb”.

Deputatın sözlərinə görə, ayrılan torpaq sahələrinin sənədləşdirilməsi, statusun əldə edilməsi, qorunması məsələləri müəyyən mexanizm ilə həyata keçirilməlidir.

“Real həyatda və qanunda anlayış fərqlidir. Lakin bunu bilməliyik ki, heç bir ərazi üçün konkret məzarlıq və yaşayış evlərinin yeri yoxdur. Bunu ucqar kəndlərdə, hətta xaricdə də müşahidə edə bilərik”.

Zərif Sofiyeva