İranın xarici işlər naziri Abbas Arakçi bu gün səhər saatlarında Rusiyanın yüksək səviyyəli rəsmiləri ilə görüşmək və ölkəsinin ali rəhbəri Ayətullah Xameneinin yazılı mesajını Putinə çatdırmaq üçün diplomatik heyətin başında Moskvaya gedib.

Modern.az xəbər verir ki, İran Xarici İşlər Nazirliyinin sözcüsü İsmail Bekayi jurnalistlərə açıqlamasında bildirib ki, Arakçinin Moskvaya səfəri Rusiya xarici işlər naziri Sergey Lavrovun dəvəti ilə və iki ölkə arasında strateji tərəfdaş kimi davam edən müzakirələr çərçivəsində həyata keçirilir.

"Cənab Arakçinin səfəri zamanı yüksək səviyyəli Rusiya rəsmiləri ilə ikitərəfli əlaqələr, regional və beynəlxalq hadisələr, ABŞ-la son illərdə aparılan dolayı danışıqlarla bağlı müzakirələr planlaşdırılır", - İsmail Bekayi deyib.

Xarici İşlər Nazirliyi sözcüsü bu səfərin iki ölkə arasında əldə olunan razılaşmaların, xüsusilə də İran və Rusiya arasında imzalanmış Hərtərəfli Strateji Tərəfdaşlıq Sazişinin icrasını izləmək üçün dəyərli bir fürsət olduğunu qeyd edib.