“Azərbaycan Prezident İlham Əliyevin aprelin 22-24-də Çinə səfəri zamanı keçirdiyi görüşlər, mətbuata müsahibələri, imzalanan sənədlər iki ölkə arasında münasibətlərin strateji səviyyəyə yüksəldiyini göstərdi. Səfər çərçivəsində Çin Sədri Si Cinpinin iştirakı ilə Azərbaycan və Çin arasında hərtərəfli strateji tərəfdaşlıq əlaqələrinin qurulması haqqında 18 bəndlik Birgə Bəyanat çox dəyərli əməkdaşlıq sənədi kimi qiymətləndirilir. Ölkələrimiz milli maraqlara aid məsələlərdə həmrəylik və dostluq nümayiş etdirir, bir-birilərinin suverenliyini və ərazi bütövlüyünü qətiyyətlə dəstəkləyirlər. . Tayvanda qeyri-qanuni seçkiləri ictimaiyyət qarşısında açıq şəkildə pisləyən ilk ölkələr sırasında olaraq “Vahid Çin” siyasətini qətiyyətlə dəstəkləyirik. “Bir kəmər, bir yol” təşəbbüsünə qoşulmuş ölkələrdən biri kimi ölkəmizdə xeyli infrastruktur layihələri həyata keçirilmişdir.
Bəyanatda ticarət, daşımalar, xalqlararası əlaqələr, humanitar tərəfdaşlıqla bağlı məsələlər öz əksini tapır. Yaşıl gündəlik bu istiqamətdə əsas prioritetlərdəndir. “Çin bu istiqamətdə ölkəmiz üçün çox mühüm rol oynayır. Çünki Azərbaycanda quraşdırılmış Günəş panelləri Çində istehsal olunub. Bu vaxtadək Çin şirkətləri investorlarla, Azərbaycanın yaşıl enerjisinə sərmayə yatıran şirkətlərlə podratçı qismində çalışırdılar. Müqavilələr bizə 2030-cu ilə qədər 6500 meqavat bərpaolunan enerji verəcək. Beləliklə, beş ildən sonra biz demək olar ki, elektrik enerjisinin bugünkü tutumunu iki dəfə artırmış olacağıq - 6 min meqavat Günəş və külək elektrik enerjisindən əldə olunacaq, 500 meqavat hidroelektrik stansiyalarından gələcək. Bu, bizim üçün həlledici olacaq. Çünki biz elektrik enerjisini istehsal etmək üçün əsasən təbii qazdan istifadə etməyi dayandıracağıq. Biz elektrik enerjisini bərpaolunan enerji resurslarından əldə edəcəyik və təbii qazı beynəlxalq bazarlara ixrac edəcəyik”-cənab prezidentin bu fikirləri Azərbaycanın gələcək enerji planını əks etdirir. Ölkəmiz üçün Azərbaycanda Sumqayıt şəhərində ildə 500 avtobus istehsal etmək gücündə olan BYD-nin elektrik avtobuslarının birgə istehsalı xəbəri yaşıl nəqliyyat layihələrinin genişləndirilməsi istiqamətində mühüm addımdır. Bu layihələr Bakının ictimai nəqliyyat sistemini, sonra isə Azərbaycanın bütün digər şəhərlərini tamamilə yaşıl nəqliyyata çevirmək məqsədi daşıyır. Beləliklə, bizim bərpaolunan enerji resursları ilə bağlı ikitərəfli əlaqələr istiqamətində işləmək üçün həqiqətən də nadir fürsətimiz var.
Prezident İlham Əliyev Çinin CGTN (China Global Television Network) telekanalına müsahibəsində ölkələrimiz arasında münaibətlərin siyasi-iqtisadi, mədəni və humanitar sahədə əhəmiyyətindən və iki ölkə arasındakı münasibətlərin dostluq və etibarlı əməkdaşlıq səviyyəsinə yüksəlməsindən danışdı. Səfər dövlətlərarası əlaqələrin güclənməsinə müsbət təsir göstərməklə yanaşı, vətəndaşlar da Çin-Azərbaycan münasibətlərindəki istiliyin bəhrəsini görməkdədirlər. İki ölkə arasında viza rejiminin ləğvi həm Çin, həm də Azərbaycan üçün münasibətlərin xalqlar arasında genişlənməsi imkanından da xəbər verir.”.
Bunu Modern.az-a açıqlamasında Milli Məclisin deputatı Mehriban Vəliyeva bildirib.
Onun sözlərinə görə, artıq pasport sahibi olan Azərbaycan və Çin vətəndaşları bir-birilərinin ölkəsinə vizasız səfər edə biləcəklər: “Azərbaycan daha öncə Çin vətəndaşları üçün viza rejimini ləğv etmişdi. Bu dəfə isə Çin qarşılıqlı addım ataraq Azərbaycan vətəndaşları üçün viza rejimini ləğv etdi. Düşünürəm ki, viza rejiminin ləğvi Azərbaycana invesitisiya və turist axınının artmasına səbəb olacaq. Ötən il viza rejimi ləğv ediləndən sonra Çindən ölkəmizə turist axını iki dəfə artıb. Bu da aviareyslərin sayının artırılmasını zəruri edir. Cənab Prezident müsahibəsində bir maraqlı faktı da diqqətə çatdırdı. Bildirdi ki, il ərzində 150 milyon çinli xaricə səfər edir. Onların cəmi 1 faizi Azərbaycana gəlsə, bizim üçün yetərli olar. Düşünürəm ki, füsunkar təbiətə, zəngin mətbəxə, qədim tarixə, multikultural mədəniyyətə malik Azərbaycan Çin vətəndaşları üçün cəlbedici olacaq. Digər bir məqam təhsil sahəsində əməkdaşlıqdır. Bu çox vacib sahədir. İqtisadi, hərbi, sənaye baxımından dünyanın qabaqcıl ölkələrindən olan Çində elm, texnologiya sürətlə inkişaf edir. Bu ölkədə təhsil almaq, təcrübə qazanmaq Azərbaycan gəncinə parlaq gələcək vəd edir. Azərbaycanda Çinin texnoloji, süni intellekt sahəsində təcrübələrinə böyük maraq var. Azərbaycandan Çinə təhsil almaq üçün gələnlərin sayı ildən-ilə artır. Cənab Prezidentin də qeyd etdiyi kimi, ölkəmizdə Çin-Azərbaycan Universitetinin yaradılması barədə düşünməyin vaxtıdır”.
Millət vəkili qeyd etdi ki, ölkə başçısı CGTN telekanalına müsahibəsində Çini Azərbaycana yaxın döst ölkə adlandırıb və Sədri Si Cinpin haqqında yüksək fikirlər ifadə edib: “ Ölkəmiz "Bir kəmər, bir yol" təşəbbüsünü açıq şəkildə dəstəkləmiş və sonradan qoşulmuş ilk ölkələrdən biridir. Bu təşəbbüs bizim üçün sadəcə tranzit marşrutu deyil. Biz bu marşrut üzərində şirkətlər qurmaq istəyirik. Şərq-Qərb və Şimal-Cənub nəqliyyat dəhlizləri üzərində yerləşən ölkəmizdə, demək olar ki, bütün infrastrukturlar - dəmir yolları, dəniz limanları, magistral yollar, 8 beynəlxalq hava liman inşa edilib. Regionun ən böyük yükdaşıma şirkətlərinə sahibik. Biz Çin şirkətlərinə güvənərək bu marşrut üzərində şirkətlər qurmaq niyyətindəyik. Bir müddət öncə Çin şirkətləri Azərbaycana 300 milyon dollardan artıq həcmdə investisiya yatırılmasına dair saziş imzaladılar. Bu olduqca müsbət göstəricidiri və bunun daha da genişləndirilməsi üçün hər cür imkan, şərait vardır. Bütün hallarda dünyanın böyük və qədim dövlətlərindən biri olan Çin Xalq Respublikası ilə olan münasibətlərin inkişafı Azərbaycanın milli və strateji maraqlarına uyğundur və Prezident İlham Əliyevin aprelin 22-24-də Çin Xalq Respublikasına dövlət səfəri, səfər çərçivəsində imzalanan sənədlər əlaqələrin daha da genişlənməsinə səbəb olacaqdır”.
Millət vəkili sonda qeyd etdi ki, Qlobal Cənubun ən böyük və inkişaf etmiş ölkəsi Qlobal Cənubun ən strateji ölkəsini əsas tərəfdaş seçdi. Bu Azərbaycanın yeni Dünya düzənində mövqeyi, giosiyasi arenada çoxqütblü siyasətdə ikitərəfili münasibətlərin müstəqil modeli və nümunəsidir.
