...bu gün onun 63 yaşı tamam olacaqdı
19 may tarixi “Azərbaycan Hava Yolları”nın (AZAL) mərhum pilotu, Milli Qəhrəman İqor İvanoviç Kşnyakinin doğum günüdür. Azərbaycan ictimiayyəti İqor Kşnyakini 2024-cü ilin dekabrında Rusiya tərəfindən vurulandan sonra qəzaya uğrayan “Embraer 190” sərnişin təyyarəsinin kapitanı kimi tanıyıb.
Modern.az-ın məlumatına görə, İqor İvanoviç Kşnyakin 1962-ci ildə mayın 19-da Bakı şəhərində anadan olub. Pilot ixtisası üzrə ilk təhsilini 1982-ci ildə Rusiyanın Ryazan vilayətindəki Sasovo Mülki Aviasiya uçuş məktəbində alıb. Həmçinin, 1992-ci ildə Rusiya Dövlət Hidrometeoroloji İnstitutunun meteorologiya ixtisasını bitirib.
İqor Kşnyakin əmək fəaliyyətinə 1982-ci ildə Yevlax Birləşmiş Aviasiya Dəstəsinin An-2 təyyarəsinin 2-ci pilotu vəzifəsində başlayıb.
1984-cü il yanvarın 6-dan Zabrat Birləşmiş Aviasiya Dəstəsinin An-2 təyyarəsinin 2-ci pilotu, 1990-cı ildə Azərbaycan Mülki Aviasiya İdarəsinin Yak-40 hava gəmisinin 2-ci pilotu vəzifələrində çalışıb. 1994-cü ildə Yak-40 təyyarəsinin komandiri, 1997-ci ildə AZAL Aviasiya Şirkətinin Yak-40 hava gəmisinin kapitanı vəzifəsinə təyin edilib. 1998-ci ildə Tu-134 təyyarəsinin 2-ci pilotu vəzifəsinə təyin olunub. 2005-ci ildə An-140 hava gəmisinin kapitanı, 2008-ci ildən etibarən ATR-42/72 təyyarəsinin kapitanı vəzifəsinə yüksəlib.
2013-cü iyunun 3-dən etibarən “Embraer-170/190” təyyarəsi üzrə yenidən təlim kursunu bitirdikdən sonra həmin hava gəmisinin stajçı-pilotu vəzifəsinə keçirilib. 2013-cü dekabrın 11-dən etibarən "Azərbaycan Hava Yolları" QSC-nin Uçuşların İstehsalı İdarəsinin Uçuş Xidmətində “Embraer-170/190” hava gəmisinin kapitanı vəzifəsinə təyin edilib.
2020-ci ildə Bakıdan Moskvaya uçarkən Kşnyakinin komandiri olduğu təyyarədə olan sərnişinlərdən birinin halı pisləşib. Kşnyakin təcili eniş edib və sərnişinin həyatı xilas olunub.
İ.Kşnyakinin 15,139 saatlıq uçuş təcrübəsi var idi ki, bunun 11,180 saatı kapitan kimi həyata keçmişdi. Onun da 7009 saatdan çoxu “Embraer-190” təyyarəsində olub
2024-cü il dekabrın 25-də AZAL-a məxsus “Embraer-190” təyyarəsi Rusiya hava hücumundan müdafiə qüvvələrinə məxsus Pantsir-S1 zenit raket kompleksi ilə vurulub. İqor Kşnyakin və ikinci pilot Aleksandr Kalyaninov təyyarənin idarəetmə sistemlərinin sıradan çıxmasına baxmayaraq, onu Xəzər dənizi üzərindən Aktau Beynəlxalq Hava Limanına yaxın əraziyə doğu aparıblar. Təəssüf ki, Aktau limanına 3 dəqiqəlik məsafə qalanda təyyarə qəza enişi etməyə məcbur olub. Qazaxıstanın Aktau şəhəri yaxınlığında qəza enişi zamanı təyyarə yerə çırpılıb. Təyyarənin göyərtəsində 67 nəfər olub: 62 sərnişin və 5 ekipaj üzvü. Qəza nəticəsində 29 nəfər sağ qalıb.
İqor Kşnyakin, təyyarənin ikinci pilotu Aleksandr Kalyaninov və bələdçi Hökümə Əliyeva, habelə 35 sərnişin qəza zamanı həyatını itirib.
Həlak olanlardan 25-i Azərbaycan vətəndaşıdır.
Aktauda baş vermiş dəhşətli qəzada 29 nəfərin sağ qalması məhz İqor Kşnyakinin qəhrəmanlığı sayəsində olub.
Mərhum kapitan İqor Kşnyakin, eləcə də ikinci pilot Aleksandr Kalyaninov və bələdçi Hökümə Əliyeva 29 dekabr 2024-cü ildə II Fəxri xiyabanda dəfn olunublar.
Azərbaycan Prezidentinin 29 dekabr 2024-cü il tarixli sərəncamı ilə Kşnyakin İqor İvanoviç ölümündən sonra "Azərbaycanın Milli Qəhrəmanı" adına layiq görülüb.
İ.Kşnyakinin bir oğlu və üç qız övladı var.
Milli Qəhrəmanın hər iki qızı Azərbaycan milli gimnastika komandasının üzvləridir.
A.Qorxmaz
