ABŞ prezidenti Co Baydenin Ukraynaya Rusiya ərazisinə ATACMS taktiki ballistik raketləri ilə zərbələr endirməyə icazə verməsinin ardınca Böyük Britaniya və Fransanın da oxşar qərar verməsi 3 paytaxt arasında aparılan məxfi danışıqların nəticəsidir. London və Paris bu məsələylə bağlı Vaşinqtonun qərarını gözləyirdilər.
Modern.az xəbər verir ki, bunu Ukraynaya qoyulan qadağanın götürülməsindən danışan siyasi şərhçi Elxan Şahinoğlu deyib.
Onun sözlərinə görə, Ukrayna prezidenti Vvladimir Zelenski amerikalı həmkarı Co Baydendən bu qərarı aylardır gözləyirdi.
“Bayden son ana qədər məsələni uzadırdı. Vitse-prezident Kamala Harris prezident seçilsəydi, Ukraynaya Rusiya ərazisinə uzaq mənzilli raketlərlə zərbələr endirməsi icazəsini o verməli olacaqdı. Harrisin məğlubiyyəti Baydenin planını pozdu. Belə olan halda Bayden yenidən prezident seçilən Donald Trampa son “pisliyini” etdi. Tramp Rusiya-Ukrayna müharibəsini dayandırmaq üçün plan hazırlayıb. O yanvarın 20-də andiçmə mərasimindən sonra planını işə salacaqdı”.
Ekspert bildirib ki, Trampın andiçmə mərasiminə hələ iki ay var, Ukrayna bu müddətdə Baydendən aldığı icazə müqabilində Rusiyanın içərilərindəki hərbi mərkəzlərə uzaqmənzilli raketlərlə zərbələr endirəcək.
“Tramp andiçmə mərasimindən sonra Kiyevə uzaqmənzilli raketlərlə zərbələr endirməsini qadağan etsə, bu, Ukraynanın Rusiya qarşısında zəif düşməsinə şərait yaradacaq və nəticədə Amerikada Trampa qarşı ittihamlar artacaq. Vəzifəsini təhvil verməyə hazırlaşan Co Baydenə və Demokratlar Partiyasına da elə bu lazımdır”.
“Nyu-York Tayms”ın məlumatına görə, ABŞ prezidenti Co Bayden Ukraynaya Rusiyanın dərinliklərinə zərbələr endirmək üçün Birləşmiş Ştatların verdiyi silahlardan istifadəyə mane olan məhdudiyyətləri aradan qaldırıb. Ukrayna ATACMS raketləri ilə Rusiya ərazisinə zərbələr endirə biləcək.
Fransanın "Le Figaro" nəşri yazır ki, Fransa və Böyük Britaniya da Ukraynaya Rusiyanın dərinliklərinə zərbə endirməyə icazə verib.
Nəşrin məlumatına görə, Paris və London Kiyevə "SCALP" və "Storm Shadow" raketləri ilə hücumlar etməyə qadağanı aradan qaldırıb.
Mənbələrin bildirdiyinə görə, ilk dərin zərbələrin 306 km-ə qədər mənzilli ATACMS raketlərindən istifadə edilməklə həyata keçiriləcəyi ehtimal edilir.
A.Qorxmaz
