Şanlı və tarixi zəfərimizin yaratdığı həm siyasi, həm də hüquqi reallıqlar ATƏT-in Minsk qrupunun ləğv edilməsini zəruri edir.
Bunu Modern.az-a açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Rizvan Nəbiyev bildirib.
O qeyd edib ki, Azərbaycanla Ermənistan arasında sülh sazişinin mətni razılaşdırılıb:
"Sülh sazişinin imzalanması yolunda əsas manelərdən biri kimi ATƏT-in Minsk qrupu sözügedən müqavilə imzalanana qədər ləğv edilməlidir. ATƏT çərçivəsində digər mexanizmlər - Yüksəksəviyyəli planlaşdırma komitəsi, ATƏT-in fəaliyyətdə olan sədrinin şəxsi nümayəndəsi kimi funksiyasız strukturlar da artıq de-yure ləğv edilməlidir. Bunun üçün Ermənistanla Azərbaycan birlikdə də ATƏT-ə müraciət ünvanlaya bilər. Çünki 1992-ci ildə ATƏM-in Minsk qrupu kimi yaranmış bu strukturun ləğvi ATƏT üzvü dövlətlərin konsensusu əsasında baş tutmalıdır. Bu ATƏT-də qərar qəbuletmə prosedurdan irəli gəlir".
R.Nəbiyev vurğulayıb ki, potensial risklərin qarşısını almaq üçün də Minsk qrupunun de-yure ləğv edilməsi vacibdir:
"Məsələnin siyasi tərəfi də var. Azərbaycan ərazi bütövlüyünü və suverenliyini bərpa edərək münaqişəni beynəlxalq hüququn prinsipləri əsasında həll etdiyindən artıq ATƏT-in Minsk qrupunun fəaliyyəti üçün lüzum qalmamış, mandat üçün əsas aradan qalxmışdır. Bunu Ermənistan tərəfi süni formada bunu saxlamaq və ya uzatmaq yolunu tutmaq istəyirsə, deməli, hansısa formada potensial olaraq müdaxilə imkanı bu niyyətin arxasında gizlənə bilər. Eyni zamanda ATƏT-in Mİnsk qrupundan təzyiq vasitəsi kimi istifadə edilə bilər. Bu Ermənistanın niyyətindən kənarda bu regiona maraq göstərən qüvvələr tərəfindən bu və ya digər formada gündəmə gətirə bilər. Bütün bu potensial riskləri birdəfəlik aradan qaldırmaq üçün ATƏT-in Minsk qrupun sülh müqaviləsi imzalanadək ləğv edilməlidir. Sülh müqaviləsi həmçinin dövlətlərarası münasibətlərin yardaılmasını özündə ehtiva edir. Qarşılıqlı etimad mühiti yardılmadan, başqa sözlə gizli sualtı daşlar saxlamaq cəhdi ilə nə real sülhə nail olmaq, nə də dövlətlərarası münasibətlər qurmaq mümkün olmayacaq".
