“Rusiya prezidenti Vladimir Putin “15 mayda Ukrayna ilə İstanbulda təmaslara başlamağa hazırıq” təklifini irəli sürəndə, Ukrayna lideri Volodimir Zelenskinin “İstanbulda səni şəxsən gözləyəcəm!” reaksiyasını gözləmirdi”.
Modern.az-ın məlumatına görə, bunu siyasi ekspert Elxan Şahinoğlu İstanbulda gözlənilən Rusiya-Ukrayna danışıqlarını şərh edərkən bildirib
“Putin “təmaslar” deyərkən özünün Zelenski ilə görüşünü nəzərdə tutmurdu. Yəqin Putin düşünürmüş ki, Volodimir Zelenskinin 2022-ci ildə Rusiya prezidenti ilə görüşə qoyduğu qadağa səbəbindən Ukrayna prezidenti bunu pozmaz. Ancaq Zelenski bu qadağadan imtina edərək, Putinlə görüşə hazır olduğunu bildirib”, - E.Şahinoğlu deyib.
Onun sözlərinə görə, Putin çətin vəziyyətə düşüb:
“Çünki onu İstanbulda yalnız Zelenski gözləməyəcək. Kreml sahibinin dostları - Türkiyə və ABŞ prezidentləri Rəcəb Təyyub Ərdoğanla Donald Tramp da İstanbulda görmək istəyirlər. Tramp hətta ərəb ölkələrinə səfərini korrektə edərək, 15 mayda İstanbula gəlməyə hazırdır. Putin İstanbula gələrsə, liderlərin dördlü görüşünü keçirmək mümkündür. Putinin Ərdoğana və Trampa isti münasibəti var. Putinin mətbuat katibi Dmitri Peksov prezidentin İstanbula getməyəcəyini, Rusiyanı danışıqlarda başqalarının təmsil edəcəyini bildirsə də, fikrimcə, Kreml sahibi hələ son qərarı verməyib. Ukrayna ilə yanaşı, Rusiyanın da itkilərlə müşahidə edilən və yorğun düşdüyü müharibədə uzunmüddətli atəşkəsə ehtiyacı var və bunu elan etmək üçün İstanbul yaxşı fürsətdir. Kreml sahibi şəxsən İstanbula gələrsə, atəşkəslə yanaşı, Ərdoğana çoxdan vəd etdiyi Türkiyə səfərini reallaşdıracaq və çoxdan arzuladığı Trampla görüşəcək”.
A.Qorxmaz
