Mahir Süleymanlı
Milli Məclisin deputatı
Aprelin 6-da Prezident İlham Əliyevin Gürcüstana etdiyi səfər çərçivəsində mətbuata verdiyi bəyanat ikitərəfli münasibətlərin mahiyyətini və strateji əhəmiyyətini bir daha ön plana çıxarıb. Mövcud əməkdaşlıq artıq yeni mərhələyə qədəm qoyaraq daha geniş regional və iqtisadi məzmun kəsb edir.
Azərbaycan ilə Gürcüstan arasında münasibətlər əsrlər boyu formalaşmış dostluq və qardaşlıq ənənələrinə söykənir. Bu tarixi əlaqələr dövlətlərarası münasibətlər üçün möhkəm baza rolunu oynayır. İki xalq arasında formalaşmış qarşılıqlı etimad mühiti müasir mərhələdə strateji tərəfdaşlıq səviyyəsinə yüksələrək regionda sabitlik və əməkdaşlıq üçün nümunəvi model yaradır.
Gürcüstanda mövcud olan sabitlik güclü sərmayə mühitinin formalaşmasına səbəb olub və xarici investorların marağını artırıb. Azərbaycan investorlarının bu bazarda fəal iştirakı iqtisadi əməkdaşlığın real göstəricisidir. Ticarət dövriyyəsinin artması, qarşılıqlı investisiyaların genişlənməsi və yeni layihələrin müzakirəsi iqtisadi inteqrasiyanın dərinləşdiyini göstərir. Bu dinamika yaxın gələcəkdə daha böyük iqtisadi nəticələrin əldə olunacağını deməyə əsas verir.
İki dövlət beynəlxalq təşkilatlar çərçivəsində daim bir-birinə dəstək verir. Ərazi bütövlüyü, suverenlik və sərhədlərin toxunulmazlığı kimi prinsiplər tərəflər üçün dəyişməz mövqe olaraq qalır. Həmin yanaşma yalnız ikitərəfli münasibətləri möhkəmləndirmir, eyni zamanda regionda beynəlxalq hüququn prinsiplərinin qorunmasına xidmət edir. Bu əməkdaşlıq çoxtərəfli platformalarda vahid mövqedən çıxış etməyə və ortaq təşəbbüslərin irəli sürülməsinə şərait yaradır. Tərəflərin prinsipial mövqeyi beynəlxalq müstəvidə etibarlı tərəfdaş imicinin daha da möhkəmlənməsinə səbəb olur. Nəticə etibarilə, həmrəylik regional sabitliyin təmin olunmasına və uzunmüddətli əməkdaşlığın davamlı inkişafına töhfə verir.
Səfər zamanı səsləndirilən mühüm məqamlardan biri də Cənubi Qafqazda formalaşan yeni geosiyasi reallıqlarla bağlı idi. Yeni reallıqlar region dövlətləri üçün həm siyasi, həm də iqtisadi baxımdan geniş imkanlar yaradır. İmkanların səmərəli dəyərləndirilməsi qarşılıqlı etimadın güclənməsinə və uzunmüddətli tərəfdaşlıq mühitinin formalaşmasına xidmət edir. Eyni zamanda, regional layihələrin genişlənməsi və əlaqələrin intensivləşməsi Cənubi Qafqazın beynəlxalq əhəmiyyətini daha da artırır. Dövlətimizin başçısının vurğuladığı kimi, bu gün Cənubi Qafqazda tamamilə yeni vəziyyət yaranmaqdadır və Cənubi Qafqazda yerləşən ölkələr bu imkanları əldən verməməlidir: “Çünki bu gün sülh, təhlükəsizlik, əmin-amanlıq, sabitlik əfsuslar olsun ki, dünyanın müxtəlif yerlərində pozulur və bunun nəticəsində qanlı toqquşmalar, müharibələr, əzab-əziyyət və itkilər baş verir. Cənubi Qafqazda da vaxtilə buna oxşar mənzərə mövcud idi. Amma bu gün Cənubi Qafqaz artıq sülh, əmin-amanlıq, təhlükəsizlik, əməkdaşlıq məkanına çevrilir”.
Enerji sahəsində əməkdaşlıq iki dövlət arasında münasibətlərin əsas istiqamətlərindən biridir. Azərbaycan uzun illərdir ki, geniş coğrafiyada enerji təhlükəsizliyinin təmin olunmasında mühüm rol oynayır və bu prosesdə Gürcüstan əsas tranzit tərəfdaş kimi çıxış edir. Bakı-Tbilisi-Ceyhan neft kəməri və Cənub Qaz Dəhlizi kimi layihələr regionun enerji xəritəsini yenidən formalaşdırıb. Bu layihələr vasitəsilə enerji resursları təhlükəsiz və dayanıqlı şəkildə dünya bazarlarına çıxarılır. Bununla yanaşı, Orta Dəhliz layihəsi Şərq ilə Qərb arasında mühüm nəqliyyat bağlantısı rolunu oynayır. Bu dəhliz regionun logistika imkanlarını genişləndirməklə yanaşı, iqtisadi inteqrasiyanı daha da sürətləndirir.
İki dövlət arasında əməkdaşlıq gündəliyi olduqca genişdir və dinamik şəkildə inkişaf edir. Yeni investisiya layihələri, müxtəlif sahələrdə əməkdaşlıq və gələcəkdə üçüncü ölkələrdə birgə fəaliyyət imkanları tərəfdaşlığın perspektivlərini daha da artırır. Bu münasibətlər qarşılıqlı hörmət, etimad və ortaq maraqlar üzərində qurulduğu üçün regionda sabit və etibarlı əməkdaşlıq modeli kimi qəbul olunur.
Prezident İlham Əliyevin Gürcüstana səfəri çərçivəsində səsləndirdiyi bəyanatlar bir daha təsdiq edir ki, iki dövlət arasında münasibətlər strateji xarakter daşıyır və davamlı inkişaf xətti üzrə irəliləyir. Siyasi dialoqdan iqtisadi inteqrasiyaya doğru inkişaf edən bu tərəfdaşlıq regionda sabitliyin, təhlükəsizliyin və iqtisadi rifahın təmin olunmasında mühüm rol oynamaqda davam edəcəkdir.
