44 günlük Vətən müharibəsinə qədər Ermənistanın bəzi xarici ölkələrdəki səfirliklərində qeyri-qanuni "Dağlıq Qarabağ nümayəndəlikləri" mövcud olub. İndi də belə nümayəndəlikərin qalması barədə iddialar səsləndirilir.
Azərbaycan-Ermənistan sülh prosesi fonunda səsləndirilən bu fikirlə bağlı Modern.az-a danışan Milli Məclisin üzvü Azər Badamov bildirib ki, Ermənistan hakimiyyəti hazırda Qarabağla bağlı hər hansı bir qanunsuz qurumun yaradılmasına qarşı çıxır.
O qeyd edib ki, Qarabağ məsələsi artıq həll olunub. Ermənistan hakimiyyəti də Qarabağın Azərbaycanın ayrılmaz tərkib hissəsi olduğunu qəbul edib:
"Azərbaycan və Ermənistan arasında sülh gündəliyi davam edir, qeyri-hökumət təşkilatlarının qarşılıqlı görüşləri keçirilir. İki ölkə rəsmilərinin Qəbələdə sərhədlərin delimitasiyası ilə bağlı görüşü də baş tutub”.
Milli Məclisin üzvü deyib ki, Qarabağ nümayəndəliyini yaratmağa cəhd edənlər və keçmiş Qarabağ münaqişəsini gündəmə gətirənlər Azərbaycan–Ermənistan arasında sülh gündəliyini istəməyən qüvvələrdir:
"Onlar hətta Qarabağ məsələsinin həll olunmadığını iddia edirlər və bu, əlbəttə ki, yolverilməzdir. Əsas odur ki, Azərbaycan və Ermənistan arasındakı sülh danışıqlarında fikir ayrılığı yoxdur.
Hesab etmirəm ki, Paşinyan hakimiyyətinin xaricdəki erməni lobbisi ilə Azərbaycanın mənafelərinə zidd hər hansı bir bağlantısı olsun.
Ermənistan iqtidarına müxalif erməni qüvvələri isə keçmiş Qarabağ münaqişəsindən Paşinyana olan etimadın azaldılmasında istifadə edirlər.
Təbii ki, Ermənistan hakimiyyətinin separatçılığı dəstəkləyən addımları olarsa, Azərbaycan tərəfi buna qarşı qanuni addım atacaq.
Gələn il keçiriləcək Ermənistan parlamentinə seçkilərdə də Ermənistan müxalifəti xalqın Paşinyana olan etimadını azaltmağa cəhd edəcək.
Ermənistanda bəzi dairələr Qarabağ mövzusunun həssas məsələ olmasından istifadəyə cəhd edirlər. Bu cəhdlər həm Ermənistan daxilində, həm də xaricində separatçı qüvvələr arasında müşahidə olunur. Lakin Azərbaycan–Ermənistan münasibətlərində sülh arasıkəsilməz proses kimi davam edir.
Sülhün tam bərqərar olması Ermənistan konstitusiyasına edilən düzəlişlərdən sonra mümkün olacaq ki, buna da Paşinyan hakimiyyəti perspektiv yaradır".
Cavid Zahidoğlu
