İsveç, Finlandiya, Polşa, Estoniya, Latviya, Litva, Rumıniya və Bolqarıstan liderləri Helsinkidə keçirilən sammitdən sonra Rusiyanın Avroatlantik regionda təhlükəsizlik, sülh və sabitlik üçün ən ciddi təhdid olduğunu bəyan ediblər.
Modern.az xəbər verir ki, bu barədə “Kommersant” nəşri məlumat yayıb.
Sammitin yekun bəyannaməsində bildirilib ki, Avropa İttifaqı və NATO-nun şərq cinahı bu təhlükənin ön xəttində yerləşir, lakin mövcud risk bütün Avropa qitəsini əhatə edir və təcili, koordinasiyalı addımlar tələb edir. Bu səbəbdən iştirakçılar Avropa İttifaqının şərq sərhədlərinin daha da gücləndirilməsinin vacibliyini vurğulayıblar.
Liderlər eyni zamanda Avropa İttifaqının müdafiə qabiliyyətinin artırılmasına, sərhəd təhlükəsizliyinin möhkəmləndirilməsinə və mümkün böhranlara hazırlığın yüksəldilməsinə çağırış ediblər. Yekun sənəddə qeyd olunub ki, Aİ-nin şərq xarici sərhədinin qorunması və nəzarəti yalnız ayrı-ayrı ölkələrin imkanlarına əsaslana bilməz və bunun üçün kompleks yanaşma ilə etibarlı, çoxşaxəli potensial formalaşdırılmalıdır.
Sammit ərəfəsində Finlandiyanın baş naziri Petteri Orpo da açıqlamasında bildirib ki, Rusiya ilə Ukrayna arasında sülh sazişi əldə olunacağı təqdirdə Moskva öz qoşunlarını NATO-nun şərq cinahına yönəldə bilər. O, bu ehtimalı nəzərə alaraq Avropa ölkələrini “ön xəttdə yerləşən dövlətlərin” müdafiə xərclərini artırmağa çağırıb.
