Ermənistanın Baş naziri Nikol Paşinyan və ABŞ-ın vitse-prezidenti Ceyms Vens Ermənistan hökuməti ilə ABŞ hökuməti arasında nüvə enerjisinin dinc məqsədlərlə istifadəsi sahəsində əməkdaşlıq müqaviləsi üzrə danışıqları yekunlaşdıran birgə bəyanat imzalayıblar.
Modern.az saytı Ermənistan KİV-nə istinadən xəbər verir ki, Nikol Paşinyan bunu Vens ilə keçirdiyi mətbuat konfransında açıqlayıb.
"Bu müqavilə Ermənistan və ABŞ arasında dərinləşən enerji tərəfdaşlığında yeni bir fəsil açacaq, Ermənistanın enerji ehtiyatlarının şaxələndirilməsinə töhfə verəcək və təhlükəsiz və innovativ texnologiyalar cəlb edəcək", - deyə Paşinyan bildirib.
C.Vens qeyd edib ki, nüvə əməkdaşlığı praktiki səviyyəyə çatdıqdan sonra Amerika və Ermənistan şirkətləri tərəfindən gələcək layihələrin həyata keçirilməsi üçün imkanlar açılacaq.
"İlkin investisiya 5 milyard dollar, ikinci mərhələdə isə əlavə 4 milyard dollar olacaq. Bu, həm Ermənistan, həm də mənim ölkəm üçün enerji təhlükəsizliyi və dayanıqlılığı baxımından qarşılıqlı faydalı bir vəziyyətdir. Bundan əlavə, həm ABŞ-da, həm də Ermənistanda çoxsaylı iş yerləri yaradılacaq. Amerika texnologiyası Ermənistana gələcək - ölkəmiz nadir hallarda başqa bir ölkəyə müəyyən texnologiyalar ixrac etmək üçün bu qədər əmindir", - Vens bildirib.
C.Vens həmçinin Ermənistana 11 milyon dollar dəyərində müşahidə dronlarının satışının təsdiqləndiyini açıqlayıb.
"Prezident Tramp sülhü təmin etməyin ən yaxşı yolunun ən yaxşı hərbi texnologiyaya sahib olmaq olduğunu çox yaxşı başa düşür. ABŞ-da bu texnologiya var və biz hazırda Ermənistana 11 milyon dollar dəyərində müşahidə dron texnologiyasının satışını təsdiqləyirik", - deyə o vurğulayıb.
