ABŞ-ın xüsusi elçisi Stiv Uitkoff İranın 460 kq zənginləşdirilmiş urana nəzarət etdiyini və nüvə proqramını dayandırmaq istəmədiyini söyləyib.
Modern.az xəbər verir ki, Stiv Uitkoff “Foks Nyus”a deyib ki, İran rəsmiləri bu ilin əvvəlində aparılan danışıqlar zamanı 11 nüvə bombası hazırlamaq üçün kifayət qədər zənginləşdirilmiş urana sahib olduqlarını bildirməklə, ABŞ-ı hədələyiblər.
"İlk görüşdə hər iki İran danışıqçısı bizə birbaşa, utanmadan 460 kiloqram 60 faiz zənginləşdirilmiş urana nəzarət etdiklərini və bunun 11 nüvə bombası hazırlamaq üçün kifayət etdiyini söylədilər",- Uitkoff deyib.
Onun sözlərinə görə, İran nümayəndə heyəti hər cür yoxlama protokollarını aşmağı və 11 nüvə bombasına çıxış əldə etdikləri bir vəziyyətə nail olmaları ilə fəxr edirdi.
ABŞ-ın xüsusi nümayəndəsi həmçinin xatırladıb ki, İran rəsmiləri uranı zənginləşdirmək hüququnu "başlanğıc nöqtəsi" kimi göstəriblər:
"Cared Kuşner və mən çaşqınlıqla bir-birimizə baxdıq və dedik ki, indi həqiqətən çətin vəziyyətdəyik".
ABŞ-ın xüsusi nümayəndəsi əlavə edib ki, İran təxminən bir həftə, bəlkə də 10 gün ərzində 60 faiz zənginləşdirilmiş uranı 90 faiz zənginləşdirilmiş urana çevirə bilər.
"Onların faktiki olaraq sonsuz təchizatı var", - o əlavə edib.
Uitkoff bildirib ki, ABŞ İrana uranı zənginləşdirməkdən tamamilə imtina etmək üçün 10 il təklif edib, lakin qarşı tərəf bunu qəti şəkildə rədd edib.
Donald Trampın xüsusi nümayəndəsi həmçinin bildirib ki, ABŞ prezidenti onu və kürəkəni Cared Kuşneri İranla raket proqramından imtina etmək, dəniz qüvvələrini məhdudlaşdırmaq, uranı zənginləşdirməsinə son qoymaq və proksi qüvvələrə dəstəyi dayandırmaq üçün danışıqlara göndərib.
"Biz getdik və onlarla ədalətli bir razılaşma əldə etməyə çalışdıq. Ancaq ikinci görüşün sonunda aydın oldu ki, bu, mümkün olmayacaq, amma son bir cəhd etmək üçün üçüncü görüşə də qayıtdıq".
2026-cı ilin fevral ayının əvvəlindən İrana qarşı birgə ABŞ-İsrail əməliyyatının başlanmasına qədər Vaşinqton və Tehran arasında üç raund danışıqlar keçirilib. Birinci görüş 6 fevralda Omanın Məskat şəhərində baş tutub. İkinci görüş 17 fevralda, üçüncüsü isə 26 fevralda Cenevrədə baş tutub.
Üçüncü raundda ABŞ nümayəndələri Uitkoff və Kuşner İranlı danışıqçılarla səhər görüşü zamanı eşitdikləri şeylərdən məyus olublar.
ABŞ-İsrail əməliyyatı danışıqlardan bir neçə gün sonra, 28 fevral səhəri başladıb. Əməliyyat zamanı İranın Ali Lideri Ayətullah Əli Xamenei və bir neçə yüksək vəzifəli hərbi rəsmisi öldürülüb.
İrana hücumlar indi də davam edir... İran tərəfi də cavab olaraq İsraili və ABŞ-ın Yaxın Şərq ölkələrindəki hərbi bazalarını vurur.
