ABŞ Prezidenti Donald Tramp İranla müharibədə ən çətin mərhələnin geridə qaldığını bəyan edib. Lakin İran tərəfi müharibənin bitmə vaxtını özünün müəyyən edəcəyini bildirir və tələbləri qəbul olunmayana qədər geri çəkilmək niyyətində olmadığını vurğulayır.
Modern.az xəbər verir ki, CNN münaqişənin hələ də ən çətin mərhələsini keçmədiyini göstərən əsas səbəbləri təhlil edib.
Müharibənin çətin mərhələsinin davam etməsinin 4 əsas səbəbi:
1. İranın nüvə potensialı hələ də qalır
Tramp İranın nüvə silahı əldə etməsinin qarşısının alındığını desə də, bomba hazırlanmasında istifadə oluna biləcək 400 kiloqramdan çox yüksək zənginləşdirilmiş uranın taleyi naməlum olaraq qalır. Ekspertlər hesab edir ki, Tehran hazırda nüvə silahı əldə etməyə daha meylli ola bilər.
2. İqtisadi qeyri-müəyyənlik aradan qalxmayıb
Hörmüz boğazı ilə bağlı rəsmi və davamlı razılaşma olmadan münaqişənin bitməsi İranın öz şərtlərini diktə etməsi kimi qiymətləndirilə bilər. Bu isə qlobal iqtisadiyyata ciddi təsir göstərə bilər. Gəmilərdən yüksək rüsumların tələb olunması yeni reallığa çevrilmək riski yaradır.
3. Körfəz regionunda təhlükəsizlik təmin olunmayıb
Tələsik geri çəkilmə Körfəz ölkələrini yenidən risk altına sala və İrana enerji ixracı şərtlərini diktə etmək imkanı verə bilər. Bu isə ABŞ-ın müttəfiqlərinə verdiyi təhlükəsizlik öhdəlikləri ilə ziddiyyət yarada bilər.
4. İsrail faktoru qalır
İsrail İranın hərbi potensialının tam zərərsizləşdirilmədiyini düşünərsə, hücumlarını davam etdirə bilər. Digər tərəfdən, hücumlar dayandırılsa belə, İranın cavab verməyəcəyinə zəmanət yoxdur. ABŞ-ın regiondan geri çəkilməsi isə İsrailin Livandakı problemlərini həll etmir.
