ABŞ Prezidenti Donald Trampın sosial şəbəkə platforması "Truth Social"da Hörmüz boğazı ilə bağlı İrana qarşı söyüş dolu xəbərdarlığı diqqət çəkib.
“Çərşənbə axşamı İranda Elektrik Stansiyası Günü və Körpü Günü olacaq, hamısı bir yerə yığılıb. Buna bənzər bir şey olmayacaq!!! Lənətə gəlmiş boğazı açın, dəli alçaqlar, yoxsa Cəhənnəmdə yaşayacaqsınız - sadəcə izləyin!”,-deyə Tramp özünün "Truth Social" hesabında yazıb.
Daha sonra ABŞ lideri “Çərşənbə axşamı, Şərq vaxtı ilə saat 20:00!” yazaraq yeni bir son tarix təyin edib.
Trampın paylaşımından sonra İranın bir sıra ölkələrdəki səfirlikləri ona X platforması üzərindən tənqidi cavablar veriblər.
Modern.az onlardan bəzilərini təqdim edir.
Cənubi Afrikadakı İran səfirliyinin paylaşımında Trampın paylaşımına cavab olaraq yazılıb: “25-ci düzəliş, 4-cü maddə barədə ciddi düşünün”. Qeyd edək ki, bu, vitse-prezidentə və Nazirlər Kabinetinin əksəriyyətinə prezidenti vəzifəyə yararsız elan etməyə imkan verən konstitusiya müddəasıdır.
İranın Bolqarıstandakı səfirliyi isə Trampa ironiya ilə cavab veri: “Sakit ol, pələng. (sic) Sakit ol”,-deyə yazıb.
Avstriyadakı İran səfirliyi Trampın ümidsizliyinin hiss olunduğunu yazıb:
“#POTUS görünməmiş dərəcədə dilənçilik səviyyəsinə enib, acı, boş kobudluq və təhdidlərlə doludur. Ümidsizlik demək olar ki, hər hecadan, xüsusən də təsadüfi şəkildə atılan təhqiramiz ifadələrdən hiss olunur. ABŞ-nin hücumları müharibə cinayətləridir. Başqa bir xəbərdarlıq: 18 yaşdan kiçik bütün yetkinlik yaşına çatmayanları #Trampın ritorikasına məruz qalmaqdan qoruyun”.
Birləşmiş Krallıqdakı İran səfirliyi ümumi bir atalar sözündən sitat gətirib: “Ağzını yumub insanların səni axmaq hesab etməsinə imkan vermək, onu açıb bütün şübhələri aradan qaldırmaqdan daha yaxşıdır”. Səfirlik həmçinin Trampın təhdidinin “zəiflik və xəstəlik əlaməti” olduğunu bildirib.
Zimbabvedəki İran səfirliyi “prezidentlik ədəbinin” nümunələrinin siyahısını dərc edib. Siyahıya ictimai açıqlamalarda hörmətli və ölçülü dil də daxildir.
Hindistandakı İran səfirliyi Trampa qoca deyə xitab edib: “Söyüş söymək və təhqir etmək məğlub olanların necə acı davranmasıdır. Özünə hakim ol, qoca!”.
