NASA rəhbərliyi kainatda yad həyatın mövcudluğu ilə bağlı ümidverici açıqlama verib.
Modern.az “Gizmodo” platformasına istinadən xəbər verir ki, agentliyin administratoru Jared Isaacman bildirib ki, kainatda tək olmadığımızı sübut edəcək faktların tapılması ehtimalı “kifayət qədər yüksəkdir”.
CNN-ə verdiyi müsahibədə Isaacman vurğulayıb ki, yad həyatın axtarışı NASA-nın demək olar ki, bütün elmi və kəşfiyyat fəaliyyətlərinin əsas hissəsidir. Onun sözlərinə görə, “Bizim işimiz kainatın sirlərini açmaqdır və ən böyük suallardan biri də budur: biz təkikmi?” NASA bu məqsədlə müxtəlif istiqamətlərdə tədqiqatlarını davam etdirir. Agentlik indiyədək Marsa göndərdiyi rover və landerlərlə qədim mikrob həyatının izlərini araşdırıb. Eyni zamanda, 2024-cü ildə buraxılan Europa Clipper missiyası Yupiterin Avropa peykində həyat üçün uyğun şəraitin olub-olmadığını öyrənir.
Bundan əlavə, NASA yaxın illərdə daha güclü teleskoplarla bu axtarışları genişləndirməyi planlaşdırır. Xüsusilə, 2027-ci ildə buraxılması planlaşdırılan Nancy Grace Roman Telescope kainatda yaşana bilən planetlərin aşkarlanmasına töhfə verəcək.NASA rəhbəri qeyd edib ki, o, iki dəfə kosmosa səyahət etsə də, indiyə qədər heç bir yad həyat forması ilə qarşılaşmayıb. Bununla belə, kainatın miqyasını nəzərə alaraq ehtimalların yüksək olduğunu düşünür: “2 trilyon qalaktikanın mövcud olduğu bir kainatda tək olmaq ehtimalı çox aşağı görünür.”
Qeyd edək ki, NASA daha əvvəl də yad həyatla bağlı araşdırmaları gücləndirmək üçün elmi komitələr yaradıb və bu istiqamətdə sübutların toplanmasına fokuslanıb.
