“Biz Rusiyanın arxasından və ya ona qarşı heç nə etmirik”.
Modern.az xəbər verir ki, bunu Ermənistanın Baş naziri Nikol Pashinyan hökumət iclasından sonra jurnalistlər üçün keçirilən brifinqdə bildirib. O bu fikri Qazaxıstanın xarici işlər nazirinin Ermənistana səfəri zamanı dəmir yolunun konsessiya idarəçiliyinə verilməsi məsələsinin müzakirə olunub-olunmayacağı ilə bağlı suala cavab olaraq səsləndirib.
Baş nazir vurğulayıb ki, Qazaxıstan TRIPP layihəsinə marağını gizlətmir. Onun sözlərinə görə, Qazaxıstan bu layihəyə maraq göstərən yeganə ölkə deyil — bir çox dövlətlər bu təşəbbüslə maraqlanır.
Paşinyan qeyd edib ki, Ermənistan, o cümlədən Qazaxıstanla birlikdə, digər ölkələri də Ermənistan üzərindən tranzit marşrutlardan istifadə etməyə dəvət etməlidir ki, onlar ixrac-idxal əməliyyatlarını və nəqliyyat-logistika zəncirlərini bu istiqamətdə qura bilsinlər.
O həmçinin əlavə edib ki, Qazaxıstandan başqa, bir çox ölkə “Cənubi Qafqaz dəmir yolları” ilə bağlı məsələlərə maraq göstərir.
Xatırladaq ki, daha əvvəl “Qazaxıstan Dəmir Yolları” şirkətinin və ölkənin Nəqliyyat Nazirliyinin nümayəndələri bildiriblər ki, hazırda Qazaxıstan Ermənistan dəmir yolları üzrə Rusiyaya məxsus konsessiyanın alınması ilə bağlı danışıqlar aparmır.
