ABŞ kəşfiyyat orqanları hesab edir ki, davam edən atəşkəs və gərginliyin azaldılması istiqamətində diplomatik təşəbbüslərə baxmayaraq, Çin İran üçün silah tədarükünə hazırlaşır.
Modern.az xəbər verir ki, bu barədə CNN son kəşfiyyat hesabatları ilə tanış olan mənbələrə istinadla məlumat yayıb.
Məlumata görə, mümkün transferlərə daşına bilən zenit-raket kompleksləri də daxil olmaqla, hava hücumundan müdafiə sistemləri daxildir. Belə silahlar aviasiya üçün ciddi risk yaradır və İranın müdafiə imkanlarını əhəmiyyətli dərəcədə gücləndirə bilər.
Mənbələrin iddiasına əsasən, silahların birbaşa Çindən İrana göndərilməsi deyil, üçüncü ölkələr üzərindən daşınması ehtimal olunur. Bu üsul vasitəsilə mənşəyi gizlətmək və Pekin üçün siyasi riskləri minimuma endirmək məqsədi güdülür.
Kəşfiyyat məlumatlarında vurğulanır ki, İran mövcud nisbi sakitlikdən istifadə edərək hərbi potensialını bərpa etməyə çalışa bilər. Xüsusilə, ABŞ və onun müttəfiqlərinin İranın hərbi infrastrukturuna endirdiyi zərbələrdən sonra arsenalın yenidən formalaşdırılması məsələsi ön plana çıxır. Bu kontekstdə hava hücumundan müdafiə sistemlərinin mümkün tədarükü, xüsusilə atəşkəs dövründə, qüvvələr balansına ciddi təsir göstərə bilər.
Qeyd olunur ki, nəzərdə tutulan silahlar formal olaraq müdafiə xarakterli sayılsa da, daşına bilən zenit kompleksləri yalnız müdafiə ilə məhdudlaşmır. Onlar aktiv döyüş əməliyyatlarında, o cümlədən təyyarələrə qarşı hücumlarda da effektiv istifadə oluna bilir. Bu tip sistemlər artıq müxtəlif münaqişələrdə, xüsusən də asimmetrik müharibə şəraitində öz effektivliyini sübut edib.
