Lənkəran Ağır Cinayətlər Məhkəməsinin hökmü ilə 9 il müddətinə azadlıqdan məhrum edilən, rüşvət almaqda təqsirləndirilən keçmiş müstəntiq Rüfət Səfərov barəsində olan hökmdən apelyasiya şikayəti veriləcək.
Bu haqda Modern.az-a onun hüquqlarını müdafiə edən vəkil Bəhruz Bayramov məlumat verib.
Hökm 3 gün sonra veriləcəyini bildirən vəkil, həmçinin müvəkkilinin 1saylı Bakı İstintaq Təcridxanasına köçürüldüyünü deyib:
“Rüfət Səfərov bu gün səhər saatlarında Lənkəran rayon Polis İdarəsinin müvəqqəti saxlanma yerindən 1 saylı Bakı İstintaq Təcridxanasına köçürüldü.
Onun barəsində qanunsuz hökm çıxarılıb. Biz hüquqi müstəvidə mübarizəmizi davam etdirəcəyik. Mən belə bir qanunsuz hökm görməmişdim. Müdafiə çıxışı olmadan, son söz deyilmədən hökm çıxarılması harda görülüb?!
İlk dəfə də onu saxta ittihamlarla tutmuşdular. Rüfətin atası Eldar Sabiroğlu ölkə başçısına müraciət edəndən sonra onu ev dustaqlığına buraxdılar”.
Hüquq müdafiəçisi müvəkkilinin yenidən həbs edilməsini onun ölkədə baş verən hadisələrə münasibət bildirməsilə əlaqələndirib:
“Rüfət heç bir siyasi partiyanın üzvü deyildi, sadəcə cəmiyyətdə baş verən hadisələrə fikir bildirir, hüquqşünas kimi müsahibələr verir, məqalələr yazırdı.
Məqalələrində isə sırf qanunlardan danışırdı.
Bir də həbsindən 8-9 gün qabaq sabiq səhiyyə naziri Əli İnsanova yeni cinayət işi açılması ilə bağlı müsahibə vermiş, hüquqşünas kimi öz mövqeyini bildirmişdi. Mən hesab edirəm ki, onun 9 il müddətinə azadlıqdan məhrumetmə cəzasına məhkum olunmasına bu hallar əsas olub. Çox heyf ki, vəkilindən əvvəl dostu kimi onun bu addımlarının qarşısını ala bilmədim”.
Baş Prokurorluğun məlumatına görə, Zərdab Rayon Prokurorluğunun keçmiş müstəntiqi R.Səfərov “Prokurorluq haqqında” qanunun 34-cü və “Azərbaycan Respublikası Prokurorluğu işçilərinin etik davranış Kodeksi”nin 30 və 31-ci maddələrinin tələblərini kobud surətdə pozaraq prokurorluq orqanlarında prokuror və ya müstəntiq vəzifəsi ilə bir araya sığmayan hərəkətlərə yol verdiyinə görə, prokurorluq orqanlarından xaric edilib. Onun barəsində Baş prokuror yanında Korrupsiyaya Qarşı Mübarizə Baş İdarəsində Cinayət Məcəlləsinin 311.3.2-ci maddəsiylə cinayət işi başlanıb.
Binəqədi Rayon Məhkəməsində onun barəsində 3 ay 26 gün müddətinə həbs qətimkan tədbiri seçilmişdi. Bir müddət sonra isə məhkəmənin qərarı ilə R.Səfərovun barəsindəki həbs qətimkan tədbiri ev dustaqlığı ilə əvəz edildi və o azadlığa buraxıldı.
Lənkəran Ağır Cinayətlər Məhkəməsinin hökmü ilə R. Səfərov 9 il müddətinə azadlıqdan məhrum edilib.
R.Səfərov Müdafiə Nazirliyinin mətbuat xidmətinin keçmiş rəhbəri, sabiq deputat Eldar Sabiroğlunun oğludur.
Gülşən RAUFQIZI
