BMT-nin İctimai İnformasiya Departamentinin (UN DPI) Azərbaycandakı nümayəndəliyi, Ümumdünya Səhiyyə Təşkilatının (ÜST) Azərbaycandakı nümayəndəliyi, “Lider Qadınlar” İctimai Birliyi və "Azərbaycan Həkimlər və Təbib Tələbələr" İctimai Birliyi 4 fevral Ümumdünya Xərçənglə Mübarizə Günü ilə bağlı dəyirmi masa təşkil edəcək. Tədbir 3 fevral 2012-ci il, saat 11.00-da BMT-nin Azərbaycandakı nümayəndəliyinin əsas ofisində konfrans zalında baş tutacaq.
Hər il 4 fevral bütün dünyada Ümumdünya Xərçənglə Mübarizə Günü kimi qeyd edilir. Hər il fərqli mövzulara və problemlərə toxunan Günün 2012-ci il üçün mövzusu “Birlikdə bu mümkündür” seçilib. Bu mövzunun seçilməsində əsas məqsəd ayrı-ayrı fərdlərin, təşkilat və hökumətlərin birgə fəaliyyəti vasitəsilə 2025-ci ilə qədər xərçəng və digər qeyri-infeksion xəstəliklər nəticəsində baş verən vaxtından əvvəl ölüm hallarının sayını 25% azaltmağın mümkünlüyünü göstərməkdir.
BMT-nin İctimai İnformasiya Departamentinin məlumatına görə, dünyada xərçəng xəstəliyindən hər il 7 milyondan artıq insan həyatını itirir. Hazırda bu diaqnozla 20 milyon insan yaşayır. Ümumdünya Səhiyyə Təşkilatının məlumatına görə, 2030-cu ildə onkoloji xəstələrin sayı iki dəfə artacaq. İlbəil bu xəstəliyə düçar olanların sayı çoxalır. Xəstəliyin bu qədər sürətlə artmasının əsas səbəblərindən biri də məlumatsızlıqdır.
Modern.az
