İstefada olan polkovnik Nazim Nağıyev kafedra müdiridir
Bakının Səbail və Binəqədi rayonlarının sabiq rəisi Nazim Nağıyev jurnalistlərə və eləcə də ictimaiyyətə yaxşı tanışdır. Vaxtilə icazəsiz aksiyaların ən çox keçirildiyi Səbail rayonunda bu cür tədbirlərin qarşısının alınmasında polis polkovniki Nazim Nağıyevin xüsusi xidmətləri vardı.
Bir sözlə, Bakıdakı gur siyasi proseslərinin gedişində N.Nağıyev fəal şəkildə fərqlənib.
Bu səbəbdən də onun adı bir zamanlar medianın daim gündəmində idi. Modern.az saytı eks-polis rəisinin hazırda nə işlə məşğul olduğunu araşdırarkən maraqlı məlumat əldə edib.
Əməkdaşımıza məlum olub ki, keçmiş polis rəisi Nazim Nağıyev hazırda Milli Aviasiya Akademiyasında çalışır. Belə ki, istefada olan polis polkovniki N. Nağıyev 2008-ci ildən Milli Aviasiya Akademiyasının Aviasiya təhlükəsizliyi kafedrasına rəhbərlik edir.
Nazim Nağıyev 1972-ci ildə BDU-nun riyaziyyat fakültəsini bitirib. Mərkəzi Statistika İdarəsində mühəndis (1974-1976), Milli Elmlər Akademiyasının “Kaspi” elmi mərkəzində elmi işçi (1976-1977), dövlət orqanlarında (1977-2006) müxtəlif vəzifələrdə çalışıb.
Nazim Nağıyev əsas karyerasını polis sistemində qurmuşdu. O, uzun illər Bakı şəhərinin mərkəzi rayonlarından sayılan Səbailin Polis İdarəsinə rəhbərlik edib. Daha sonra Nazim Nağıyevin iş yeri Səbaildən Binəqədiyə dəyişdirilib.
Bir müddət Binəqədi rayon Polis İdarəsinin rəisi vəzifəsində çalışan Nazim Nağıyev 2006-cı ilin iyul ayında istefaya göndərilib. O, 2006-cı ilin iyul ayında daxili işlər naziri Ramil Usubov tərəfindən fəxri fərmana layiq görülərək, nazirin əmrinə əsasən yaş həddi ilə əlaqədar təqaüdə göndərilib. O zaman Nazim Nağıyev bir müddət əmrə etiraz etsə də, sonradan qərara tabe oldu.
Qeyd edək ki, Nazim Nağıyev hakim Yeni Azərbaycan Partiyasının qurucularından olan, vaxtilə bu təşkilatın sədr müavini postunu tutmuş keçmiş əmək və əhalinin sosial müdafiəsi naziri, Azərbaycanın Belarusdakı sabiq səfiri Əli Nağıyevin qardaşıdır.
Hazırda Milli Aviasiya Akademiyasının Aviasiya təhlükəsizliyi kafedrasına rəhbərlik edən Nazim Nağıyev hüquq elmləri namizədi, dosentdir.
A.Qorxmaz
