Rusiya prezidenti Vladimir Putinin dekabrın 19-da keçirləcək mətbuat konfransına Azərbaycan Kütləvi İnformasiya Vasitələrini təmsil edən 4 jurnalist akkreditə olunub. Modern.az saytı bildirir ki, azərbaycanlı jurnalistlərin adları bu gün açıqlanan siyahıda göstərilib.
Modern.az-ın xəbərinə görə, Putinin mətbuat konfransında AzərTaC-dan Fəridə Abdullayeva, APA-dan Fərid Əkbərov, SalamNyus-dan Roman Ağayev və AzerRoss-u təmsil edən Cəmil Sadıxbəyov iştirak edəcək.
Rusiya prezidentinin hər il keçirilən ənənəvi mtəbuat konfransında iştirak etmək üçün bu il 1319 xarici və yerli KİV qeydiyyatdan keçib.
Modern.az-ın Putinlə görüşə gedən azərbaycanlı jurnalistlər haqda xəbərindən sonra “Azadlıq” radiosu “Sizcə, Azərbaycan jurnalisti Putindən nəyi soruşmalıdır?”-deyə sorğu keçirib. Sorğuda elə Rusiya prezidentinin mətbuat konfransına gedəcək həmin jurnalistlərdən də 2-si iştirak edib.
«Yəqin ki, siz yenə Qarabağ haqqında sual verəcəksiniz» – Rusiya prezidenti Vladimir Putin bu sözləri ötənilki ənənəvi mətbuat konfransında Azərbaycan jurnalistlərinə ünvanlamışdı. Onlar isə Putindən sual vermələrinə şərait yaratmasını tələb etmişdilər.
Builki mətbuat konfransında da öncəlikli sualı yenə Dağlıq Qarabağın taleyi barədə olacaq. Bunu SalamNews-un sözügedən mətbuat konfransında iştirak etmək üçün qeydiyyatdan keçmiş müxbiri Roman Ağayev deyir. R.Ağayev Putinin xoşuna gəlsə də, gəlməsə də, ona Qarabağ münaqişəsi ilə bağlı sual verməyi planlaşdırır:
«Bizi maraqlandıran məsələ Azərbaycanla Ermənistanın Dağlıq Qarabağ münaqişəsi ilə bağlıdır. Hələ 9 il öncə – Putinin 2006-cı ildəki mətbuat konfransında da Ermənistanda yerləşən Rusiya hərbi bazaları barədə soruşmuşdum. O vaxtdan bəri vəziyyət dəyişməyib. İndi də soruşmaq istəyirəm ki, Rusiya Qarabağ münaqişəsinin həlli üçün konkret nə təklif edir? Vasitəçi bayrağı altında Ermənistana silah-sursat göndərmək və bir yandan da Azərbaycanı tərəfdaş adlandırmaq, yoxsa həqiqətən də Cənubi Qafqazda bir münaqişənin həllini istəyir?».
Roman Ağayev deyir ki, azərbaycanlı miqrantlar barədə də Rusiya prezidentinə sual ünvanlamağı düşünür. Onun sözlərinə görə, bir rus gəncin ölümündə suçlandırılan Orxan Zeynalovdan sonra Rusiya mətbuatında sanki azərbaycanlılara nifrət aşılanır. O, imkan yaradılsa, mütləq bu məsələni də Rusiya prezidentindən soruşacağını bildirir:
«Hər hansı cinayətkara görə onun mənsub olduğu millət təqib olunmalıdır? Mətbuatın bu yöndə təbliğat aparması nə dərəcədə düzdür?
Putinin cavablarında yeni bir nüansın üzə çıxacağına inanmasam da, belə suallarla Azərbaycan-Rusiya münasibətlərindəki problemli məsələləri qabardacağıq».
«SORUŞA BİLƏRİK Kİ...»
APA-nın Moskva müxbiri Fərid Əkbərov da mətbuat konfransına qatılacaq. O da həmkarı kimi, Qarabağ məsələsini ön plana çəkir:
«Münaqişənin həlli üçün Rusiyanın vasitəçiliyində passivlik gözə çarpır. Soruşacağam ki, Medvedev-in vaxtında prezidentlər bir neçə də görüşsələr də, Putin hakimiyyətə gəlincə niyə yenə passivlik müşahidə edilir?».
Fərid Əkbərov deyir ki, şərait yaradılsa, Gömrük İttifaqı ilə də bağlı sualı var. Hələlik, sualı tam dəqiqləşdirməyən Fərid bəzi rusiyalı ekspertlərin Azərbaycanın Gömrük İttifaqına üzvlüyünün rəsmi Moskva üçün o qədər də aktual olmadığını söyləməsinin səbəbləri ilə maraqlanır:
«Soruşa bilərik ki, Azərbaycan torpaqlarının 20 faizini işğal edən Ermənistanla Gömrük İttifaqında necə təmsil oluna bilər?».
FACEBOOK-DAN PUTINƏ AZƏRBAYCANSAYAĞI SUALLAR
Facebook istifadəçiləri də elə hesab edirlər ki, Putin-in Azərbaycanla bağlı cavablandıracağı xeyli sual var. Məsələn, Fuad Kərimov adlı istifadəçi deyir: «Soruşmaq olar ki, nə zamana kimi ermənilərə himayədarlıq edəcəklər? Və maraqlıdır, iqtisadi cəhətdən bu qədər zəif ölkəyə nə üçün himayədarlıq edib silahı, nefti və qazı pulsuz və ya çox ucuz qiymətə verirlər? (hərçənd səbəb məlumdur, amma rəsmi olaraq özündən eşitmək yaxşı olardı)».
Elçin Bayramlı soruşmaq istəyir: «Əsas sual budur – Nə etsək, Qarabağın bizə qaytarılmasında yardım əlinizi uzada bilərsiniz? Görək, onun tələblərini bizim hökumət niyə etmir?».
Xaqani Səfəroğlunun da sualı var: «Azərbaycanın Gömrük İttifaqı ilə bağlı mövqeyinə Rusiyanın münasibəti necədir? 2015-ci ilin yanvarından sonra Avrasiya İqtisadi Məkanı rəsmən qüvvəyə minəcək. Bakı bu sazişə qoşulmasa, onunla münasibətlər necə qurulacaq?».
Şəhla Əliquliyeva soruşur: «Cənubi Qafqazdan, nəhayət, nə vaxt qəmişini çəkəcək?».
İsmayıl Əyyubovdan belə bir sual səslənib: «Putin-dən jurnalist olaraq soruşardım ki, Rusiya dövləti doğrudanmı bu millətçilərlə bacarmır, yoxsa miqrantlara qarşı baş verənlər rəsmi strukturların mövqeyi ilə üst-üstə düşür? Və əlavə olaraq... Əgər Azərbaycanda ruslara qarsı adekvat hərəkətlər edilsə, Rusiyanın mövqeyi necə olar?».
Sədaqət Paşayevanın sualı belədir: «Çox qısa olaraq soruşa bilərlər ki, 70 il bəs etmədi xalqları assimilyasiya etməyə? Nə istəyirsən azad ve demokratik cəmiyyət qurmaq istəyən insanlardan???».
Qızılgül Abdinova soruşmaq istəyir: «Avrasiya İttifaqına qoşulsaq, bizi hansı güzəştlər, imtiyazlar gözləyir?».
Nemət Şahverdiyev soruşur: «Niyə Qarabağı tərk etmirsiniz?».
POLİTOLOQDAN MƏSLƏHƏT: «BU MƏSƏLƏNİ SORUŞMAQ OLAR Kİ...»
Politoloq Fikrət Sadıqovun fikrincə, Putindən Azərbaycanla bağlı soruşmalı əsas məsələlərin başında Qarabağ münaqişəsi və rəsmi Moskvanın mövqeyi gəlir:
«Rusiya həm Ermənistana, həm də Azərbaycana silah satır, bu məsələni soruşmaq olar ki, münaqişədə olan iki qonşu ölkəyə silah satmaqda məqsədi nədir?».
Fikrət Sadıqov deyir ki, Azərbaycan jurnalistləri Putindən Avrasiya və Gömrük İttifaqının postsovet respublikalarına nə verəcəyini də soruşa bilər:
«Bu o deməkdirmi ki, Avrasiya və Gömrük İttifaqına girməklə respublikalar Avropa Birliyi ilə münasibətlərini dondurmalıdır?».
Politoloq miqrantlarla, özəlliklə Rusiyada çalışan azərbaycanlılarla bağlı problemlərə də Rusiya prezidentinin münasibətinin öyrənilməsini vacib sayır:
«Rusiya Federasiyası müxtəlif xalqlardan və kiçik etnoslardan ibarət bir dövlətdir. Amma biz onu da görürük ki, etniklərin nümayəndələrinə qarşı bir nifrət və təqib gözə çarpır. Bu o deməkdirmi ki, Rusiyanın düşünülmüş milli siyasəti yoxdur?».
Modern.az
