Modern.az

"Qanunları düzgün icra etməyənlər ciddi cəzalandırılmalıdır"

"Qanunları düzgün icra etməyənlər ciddi cəzalandırılmalıdır"

19 İyul 2010, 13:21
Millət vəkili - jurnalist polemikası...

Modern.az saytı və Parlament Jurnalistləri Birliyinin layihəsi çərçivəsində parlament jurnalistlərinin Milli Məclisin komitə rəhbərləri ilə görüşü davam edir. Bu silsilədən olan növbəti görüş Milli Məclisin Sosial siyasət komitəsinin sədri Hadi Rəcəbli ilə keçirilib.
Görüşdə PJB sədri Elşad Eyvazlı, “Ekspress” qəzetinin əməkdaşı Aqil Aslan, “Bizim yol” qəzetinin əməkdaşı Pərviz Həşimli, "Olaylar" agentliyinin əməkdaşı Alim Hüseynli, “Hürriyyət” qəzetinin əməkdaşı Zülfüqar Hüseynzadə, “525-ci qəzet”in əməkdaşı Kamil Həmzəoğlu, AzərTAc-ın əməkdaşı Xətayi Əzizov iştirak edib.

PJB sədri Elşad Eyvazlı bildirib ki, bundan öncə eyni məzmunlu görüşü parlamentin İnsan hüquqları komitəsinin sədri Rəbiyyət Aslanova və Mədəniyyət komitəsinin sədri Nizami Cəfərovla keçiriblər: “Burada məqsəd üçüncü çağırış Milli Məclisin beş illik fəaliyyətinə komitə rəhbərinin münasibətini öyrənmək, komitənin gördüyü işlər, hazırladığı sənədlər barədə geniş məlumat əldə etmək, digər məsələlər barədə geniş diskusiya aparmaq, jurnalistləri maraqlandıran suallara cavab almaqdır. Nəzərdə tutmuşuq ki, parlament seşkilərinə bütün komitə rəhbərləri ilə görüşləri başa çatdıraq”.  

Hadi Rəcəbli isə deyib ki, o da özünü jurnalistlərin həmkarı hesab edir və bu təşəbbüsü alqışlayır.
Söhbətə mətbuatın vəziyyəti ilə başlanılıb.

Elşad Eyvazlı:
- Hadi müəllim, deyəsən Azərbaycan mətbuatından  o qədər də razı deyilsiniz?

Hadi Rəsəbli:
- Yox, əksinə. Mənim boynuma qoyma, Azərbaycan mətbuatından mən razıyam. Amma başqa şey deyəcəyəm. Birincisi, mən mətbuat işçilərinin hamısını təbrik edirəm, ikincisi, özümü heç vaxt mətbuatdan ayrı hiss eləməmişəm, siz özünüz yaxşı bilirsiniz. Mən ömrümün çox gözəl dövrünü - iki ilini Azərbaycanın Mərkəzi Komitəsinin mətbu orqanında keçirmişəm. Hesab edirəm ki, müstəqil Azərbaycan jurnalistikasında bir təkamül prosesi gedir. Jurnalistlər formalaşırlar, kommunist dövrünün sərhədli jurnalistikasından bu gün sərbəst, senzurasız jurnalistikaya keçirik. Amma bu keçidin özü gəlin etiraf edək ki, problemlərlə doludu. O problemləri həm cəmiyyətin bir hissəsi, həm də jurnalistlərin bir hissəsi yaradır...
Bilirsiniz, bu gün telekanallar elə verilişlər sərgiləyirlər ki, o verilişlər problemi həll etmir, əksinə həmin problemləri təbiğ edir... Elə götürək ANS-in “Elgizin cümə axşamı”, ATV-nin “Sən tək deyilsən” verilişlərini.

Elşad Eyvazlı:
- Hadi müəllim, o məsələlərə qayıdarıq...

Pərviz Həşimli:
- Sizə elə gəlmir ki, problemlərin çoxunu hakimiyyət yaradır.Çünki jurnalistlərə təzyiqlər, həbslər var...

Hadi Rəcəbli:
- Elə şey yoxdur. Hakimiyyət sənin üçün bu günləri senzuranı ləğv edib. Hakimiyyət neyləməlidir?

Pərviz Həşimli:
- Niyə jurnalistlər həbs olunur?

Hadi Rəcəbli:
- Ona görə ki qanunu pozurlar, təhqir eləyirlər. Niyə həbs olunurlar,  mən indi deyəcəyəm . “İdeal” qəzeti mənim haqqımda elə şeylər yazmışdı ki, mənim oğlanlarım bu qəzetin redaktorunu da, onu yazan  muxbiri də parçalamağa hazır idilər. Elə iyrənc, cəfəng şeyi bu gün mətbuatda yazmaq olar? Xaricdə də bunu yazmaq olmaz. Mən sizi inandırım ki, onlar qanla bərabər söz yazıblar. Belə iftira, təhqir yazmaq olmaz axı.
Sən yazmışdın kürəkənimdən yol polisləri 70 manat alıblar. Mən demək istəyirəm ki, qanuni kim pozur, o da cavab verməlidir. Mənim kürəkənim qanunu pozmasın, 70 manat da cərimə verməsin. Əslində, mahiyyət ondan ibarət idi. Amma sən başqa cür yazmışdın. Nəyi demək istəyirəm, hakimiyyət bu gün jurnalistikaya dözümlülük nümünəsi göstərir. Jurnalistlər bəzən o dözümlülükdən sui-stifadə edirlər. Görün, bu günə qədər neçə illərdi sizinləyəm, kimi məhkəməyə vermişəm? Heç kimi...
Amma mənə qarşı nə qədər haqsız yazılar gedib, ədalətsiz yazılar gedib, mənəviyyatsız yazılar gedib, təhqiramiz yazılar gedib. Özü də mənim kimi adam haqqında. Axı mən loyal adamam. Mən iqtidarın nümayəndəsiyəm, amma münasibətlərdə düşmənçiliyin tərəfdarı deyiləm. Hesab edirəm ki, bu gün Azərbaycanda sözün əsl mənasında jurnalistikada çox yaxşı bir mühit var, işləməli bir şərait var. Sən nə istəyirsən yaza bilirsən.
“Bizim Yol” qəzetində nə istəyirsən yazırsan, buna görə səni söyməyiblər ki, mən sənə zəng edirəm, deyirəm ki, qardaş, flan şeyi belə yazsan, daha yaxşı olardı...

Zülfüqar Hüseynli:
- Siz özünüzü hansı nəslin nümayəndəsi hiss edirsiniz?

Hadi Rəcəbli:
- Birincisi, mən ruhən özümü gənclər siyahısında hiss edirəm. Mənim ruhum həmişə gəncdir, mənim məfkürəm dünyaya  baxışım, geyimim,  görürsünüz də həmişə seçilir.

Zülfüqar Hüseynli:
- Hətta yerişinizdə də bu belədi?

Hadi Rəcəbli:
- Bir az şux geyib gəzmək istəyirəm. İdmanla da məşğul oluram, velosiped də sürürəm, şortda da gəzirəm. Demək istəyirəm ki, qəlbən, ruhən özümü gənc hesab edirəm. Amma müdriklik baxımından yanaşanda, gəlin, biz mənim həyatıma baxaq. 12 yaşımdan mən işləmişəm. Həyatda nə qazanmışam, özüm qazanmışam, zəhmətimlə qazanmışam. Kasıbçılıq görmüşəm, pulsuzluq görmüşəm, təhqir görmüşəm, aşağılanmaq görmüşəm, haqsızlıq, ədalətsizlik görmüşəm...

Zülfüqar Hüseynli:
- Amma çox da vəzifə görmüsünüz?

Hadı Rəcəbli:
- Bəli, mən 23 yaşımdan vəzifələrdə olmuşam. Komsomolun 2-ci katibi, 1-ci katibi olmuşam. Əsgərliyə getmişəm, çıxmışam vəzifədən, oxumağa getmişəm. Yəni enişli-yoxuşlu həyat yolum olub. Vizual olaraq elə görünür ki, hər şey yaxşı olub, amma elə deyil. Mən Şəkidə 5 il birinci katib işləmişəm, necə işləmişəm, bir mən onu bilirəm, bir Allah bilir. Görüntü olub, 1-ci katib maşında gedir, amma təziqlər altında, narahatçılıq...
O zaman ulu öndərimiz getmişdi, Vəzirov gəlmişdi. Vəzirovun dövründə mən birinci katib işləmişəm Şəkidə, amma hər dəqiqədə məni çıxartmaq istəyirdilər.

Pərviz Həşimli:
- Şəkililərin sizinlə bağlı lətifələri var?

Hadi Rəcəbli:
- Mənə ağbaş katib deyirdilər. Şəkililər mənim haqqımda yaxşı danışıblar həmişə. Bilirsiniz, həyat yolum imkan verir ki, müdrik sözünü götürüm. Mən bu gün siyasi elmlər doktoruyam, bunu da bəzən görürsən ki, qəbul etmək istəmirlər müəyyən adamlar. Mən öz sahəm üzrə siyasi elmlər doktoruyam, mən sosial-siyasət üzrə müdafiə eləmişəm. Nə demək istəyirəm, bu gün həm jurnalistlərin dostu kimi, həm də deyək ki,  gənc ruhu olan adam kimi örnək olaraq nəsə deyə bilərəm, nədənsə danışa bilərəm, həyatdan gördüyümdən, eşitdiyimdən bir məsləhət verə bilərəm.  

Alim Hüseynli:
- Hadi müəllim, rəhbərlik etdiyiniz komitə nəyə nail olub, nəyə nail ola bilmir? Sizcə insanlar sosail güzəranından niyə gileylidirlər: 

Hadi Rəcəbli:
- Sizə deyim ki, xaricə kim gedibsə, taksiyə oturanda bir söhbət salsın, görsün sürücü nə danışır? Mütləq narazılıq eşidəcək. Hətta xarici deputatlarla görüşəndə onlar maaşlarının azlığından şikayətlənirlər. Amma xaricdə çox təhqir hesab olunur ki, kimdənsə maaşını soruşasan. İnsan nə qədər çox təmin olunursa, onun tələbatı bir o qədər də artır. Bu baxımdan Azərbaycanda da bu proseslər gedir və Azərbaycanda əhalinin bu gün çox istəməsinin səbəbini mən Azərbaycanın sosial-siyasətində görülən işlərlə əlaqələndirirəm. 2008-ci ildə Azərbaycanda əməkhaqları kəskin sürətdə artdı. Amma proses dayanmadı ki...
İnsanlarımız  dayanaydı da, yenə də artım istəyirlər.

Alim Hüseynli:
- Unvanlı sosial yardım o adama verilir ki, ona ehtiyacı var. Sizə bu məsələ ilə baglı şikayətlər olubmu?

Hadi Rəcəbli:
- İndi sən mənimlə danışırsan, mən də sənə deyirəm jurnalistlər var ki, gedirlər təhqir edirlər, pul almaq istəyirlər, gedirlər qəzetdə itira yazırlar.  Neqativdən danışdıqda bunlar da neqativdi də. Cəmiyyət pozitiv və neqativdən ibarətdir. Neqativ və pozitivin vəhdətindən əkslərin mübarizəsi yaranır, inkşaf oradadı. Niyə bizdə müxalifət var, ona görə ki, müxalif fikir olmalıdır, əkslərin mübarizəsi olmalıdır.

Zülfüqar Hüseynli:
- Sosial siyasət komitəsinin statistikası varmı ki, son 5 ildə sizə nə qədər müraciət daxil olub, onların neçəsi müsbət həll olunub?

Hadi Rəcəbli:
- Bir dəfə Mürtüz müəllim spiker işləyəndə mənə çox möhkəm irad tutdu ki, “sən Milli Məclisə şikayətə gələnlərə çox üz göstərirsən, kömək edirsən, neyləyirsən... Bura maddi təminat yeri deyil...”.
Yəni sən bu adamlara üz göstərirsən, onlar da axışıb tökülürlər bura. Onun dediyində bir az həqiqət var idi, çünki mən icra strukturunun işinə qarışırdım. Deputatın funksiyası var. Bunu onlara başa salmaq olmur. O nə bilir ki, mən işə gəlmişəm. Milli Məclisə qəbula  gələn adamların bütövlükdə yarısı bu komitəyə gəlir. Nəyə görə gəlir, çünki bizim işlədiyimiz bu insanlar sosial cəhətdən az qorunanlardır. Mən bu məsələ ilə bağlı Elşad Eyvazlıya da irad tutmuşam, biri ikrah hissi ilə deyir, “Hadi Rəcəbilnin komitəsi”, o da saytında bunu dərc edir.
Bunu belə demək düz deyil, belədə deməklə Azərbaycan xalqına ikrah hissi göstərilir. Hadi Rəcəblinin əlbəttə komitəsi kasıblar, əlsiz, ayaqsızlarla işləyən komitədir. Elə sayca götürəndə də Milli Məclisdə ən çox qanunları qəbul edən komitə bizim komitədir. Bizim üç səhifəlik qanun layihəsi parlamentdə üç gün müzakirə olunur. Amma başqa komitələrin 600 səhifəlik 250 maddəlik qanun layihəsi 5 dəqiqəyə qəbul olunur. Niyə? Çünki populizmə, söz deməyə yer var. Kiminsə pensiyası azdı, nə bilim unvanlı yardım belə oldu, problemlər var. Yəni cəmiyyətin ən ağırlı təbəqəsi, ən az təminatlı təbəqəsi ilə biz işləyirik. Qəbul etdiyimiz  qanunlarla sırf cəmiyyətin butun hissələrinə toxuna bilirik. Mənim qəbuluma gələn adamların  sayı rəsmi olaraq Milli Məclisə qəbula gələnlərin yarısı qədərdir. Amma qeyri-rəsmi olaraq bir 30 faiz də üstunə gəlmək olar. Gəlin baxaq, hansı komitənin qəbul etdiyi qanun BMT-də model qanun qəbul olunub. Bizim qəbul etdiyimiz bir qanun BMT-nin model qanunudur, bir qanun da MDB-nin model qanunudur. Demək ki,  mükəmməl işlənilib.

Xətayi Əzizov:
- Hadi müəllim yəqin ki, bütün fəaliyyətinizdə bir çərçivə də var...

Hadi Rəcəbli:
- Biz bizə verilən huquqlar çərçivəsində fəaliyyət göstəririk.

Zülfüqar Hüseynli:
- Hadi müəllim mənim 39 yaşım var. Tale elə gətirib ki, mən şəkərli diabetəm. Mən şəkərli diabet olandan sonra araşdırma apardım. Səhiyyə Nazirliyində, Əmək və Əhalinin Sosial Müdafiəsi Nazirliyində bununla bağlı dəqiq bir statistika yoxdur. Halbuki bununla bağlı qanun qəbul olunub...

Hadi Rəcəbli:
- Bilirsiniz, bu qanunu kim ortaya çıxartdı? Biz qoyduq ortaya. İcra mexanizmi var. Qanunlarda necə yazırıq, yazırıq ki, müvafiq icra hakimiyyəti tərəfindən hətaya keçirilir. Bəzi müddüəlar var ki, biz onu yaza bilmirik. Konkret deyə bilmirik ki, bunu kim həll edəcək. Bu, sonradan bəlli olur. Bəzi qanunların işləməməsinin iki səbəbi var. Birinci səbəb odur ki, qanunu hazırlayanda boşluq olur. Məsələn, biz qanun hazırlamışıq,  “Uşaqların qidalanması haqqında” qanun.  O qanunda yazmışdıq ki, kim ana südu ilə qidalanırsa, ona analıq muavinəti verilir.
Sonradan onun icrası zamanı problemlər yarandı. Yaxud da yazırıq ki, şəkərli diabet xəstələrinin təminatını yüz faiz dövlət götürür öz üzərinə. Yəqin şahidi olmusunuz, bizim komitədə qanunların müzakirəsi vaxtı mütləq Qeyri-Hökümət Təşkilatlarından kimsə olur. Qanun yaradıcılığında sosial sifarişlərlə işləməyə üstünlük veririk. Ailə Məcəlləsində neçə vaxtdır deyirlər dəyişilik ediləcək, amma eləməmişik, niyə, çünki icra mexanizmində problemlər var.
İcraya nəzarəti məhkəmə, prokurorluq orqanları həyata keçirir. Ona gərə də icranı düzgün yerinə yetirməyənlər ciddi cəzalandırılmalıdır. Biz bu barədə işləməliyik. “Məişət zorakılığı haqqında” qanun layihəsinin ilkin müzakirəsi yadınıza gələr. Deputatlarımız saçlarını yolurdular. Demək istəyirəm ki, parlament hazır deyildi.

Elşad Eyvazlı:
- Cəmiyyət hazır idi?

Hadi Rəcəbli:
- Cəmiyyətdə də müzakirə olundu. İki il müzakirə getdi. Sonra bəzi məsələlərə dəyişikliklər olundu. Televiziyalardan danışmaq istəyirəm, bayaq adlarını çəkdim. ANS-lə ATV-nin həmin  verilişlərinə baxanda vallah dəhşətə gəlirəm.
Mən Azərbaycan xalqını elə görmək istəmirəm. Axı biz Azərbaycan xalqını niyə belə göstəririk? Bu qədər tərbiyəsizlik olarmı, mən ət tökürəm o verlişlərə baxanda, iyrənirəm. Olmaz  belə. Baxın, biz nəyi təbliğ edirik?

Alim Hüseynli:
- Hadi müəllim mənim sualım sırf jurnalistika ilə bağlıdır.  Azərbaycanda jurnalistikanın inkşafı üçun kifayət qədər imkan var,  kifayət qədər şərait  yaradılıb, amma bu o demək deyil ki, jurnalistlərin  problemi həll olunub. Müxtəlif təbəqələrlə bağlı qanunlar qəbul edilir,  amma indiyə qədər jurnalistləin sosial müdafiəsi ilə bağlı bir cümlə də yoxdur. Jurnalistlər o vəziyyətə gəlib çatıblar ki, Azərbaycan vətəndaşı kimi bankdan adicə kredit götürməyə hüquqları yoxdur...

Hadi Rəcəbli:
- Təklif edirəm, sizə ki, dünyada mövcüd təcrübə var, baxın, görün, jurnalistlərin sosial müdafiəsi ilə bağlı nə qədər sənəd var? Mən sizə söz verirəm, Allah qismət eləsə, sizin dostlarınız çoxdu parlamentdə, əlimdən gələni həmişə jurnalist dostlarıma eləmişəm. Jurnalistlərin sosial müdafiəsi ilə bağlı lahiyə tapın, bir az üstundə işləyək, çıxaraq parlamentin müzakirəsinə. Bir optimal variant tapaq. Amma gəlin bir az ədalətli danışaq, bu məsələdən “reket” jurnalistlər də yararlanmağa çalışacaqlar. Ümumən isə mən sizinlə razıyam, sizin tərəfinizdəyəm.

Elşad Eyvazlı:
- Müəllimlər, həkimlər və digər sahənin insanları özləri üçün Mənzil-Tikinti Kooperativi təsis edib problemlərini həll edirlər. Belə bir kooperativi jurnalistlər də yaratdı. Amma bizə heç bir torpaq sahəsi ayrılmadı.

Hadi Rəcəbli:
- Təbiətin qanunları olduğu kimi cəmiyyətin də çox qəribə qanunları var. Mən imkanım daxilində sizə kömək etməyə çalışacam.

Elşad Eyvazlı:
- Cəmiyyətdə söz-söhbət var ki, Hadi Rəcəbli heç bir quruplaşmanın üzvu deyil, amma hamı onu qəbul edir. Bu necə olur?

Hadi Rəcəbli:
- Hadi müəllimin iş otağında “Quran” kitabı var. Birinci, gərək adam Allahdan qorxsun. İkinci, üzün müddətdir ki, mən peşəkar siyasətlə məşğul oluram. Mən Prezidentimə sədaqətli olmuşam, Prezidentimə xidmət eləmişəm, mən partiyanın liderinə xidmət eləmişəm. Əziyyət də çəkmişəm, yaxşı da olub, pis də olub, amma bu yolu getmişəm. Ən başlıcası, neyşəmişəmsə, ədalətsiz danışmamışam, insafsız olmamışam.

Elşad Eyvazlı:
- Heç bir qruplaşmaya aid olmadığınız üçün hansısa tərəflərin təzyiqlərini görmüsünüzmü?

Hadi Rəcəbli:
- Çətinliklərim olub. Bəzən mənə deyirlər, sənin düşmənin kimdi, sən axı heç vaxt pislik eləmirsən. Mənim düşmənim həsəddir. Televiziyalarda iki-üç dəfə görünən kimi, deyirlər yenə Hadi müəllim televizordadı. Onu deyəni gündə 50 dəfə göstərirlər e...
O, gedir “Gunəbaxan”da və bu kimi yerlərdə çıxış edir. Yenə deyirəm, mənim ən birinci düşmənim bu həsəddir. Mən ağa qara, qaraya ağ deməmişəm. O xətt ki, düz yoldur, mən onu bilmişəm və onu getmişəm.

Pərviz Həşimli:
- Hadı müəllim, yanınızda bir neçə dəfə olmuşam, sizin seyxlə şəkliniz var idi. İndi o şəkil gözə dəymir, bunun səbəbini bilmək olar? Məsləhət belədir ?

Hadi Rəcəbli:
- Şeyx mənə heç bir məsləhət vermir, biz onunla qonşu kəndlərdənik. Şəkil deyəndə Şeyxlə tək şəklim olmayıb. Amma o biri şəkil qəbul otağındadır.

Elşad Eyvazlı:
- Hadi müəllim, Milli Məclisdə üzun muddətdir çalışırsınız, bura həm də bir ailədir. Burada dost tapa bilmisinizmi?

Hadi Rəcəbli:
- Mənim üçün dost məfhumu ailə üzvu deməkdir. Məsələn, qardaşım kimi, oğlum kimi, ondan doğma daha kim var, həyat yoldaşıdı, bir də ata-anadır. Dostdan danışanda mən bu cür başa düşürəm. Mənim uşaqlıq dotum var, birinci sinifdə bir partada oturmuşuq, Hüseynbala müəllim  ilə biz bir yerdə böyümüşük, uşaqlığımız bir yerdə keçib, çətinlik görmüşük, yaxşılıq görmüşük.
İkinci, oturub-durduğum, yaxınlıq elədiyim kimdir, deyim. 1981- ci ildən Eldar İbrahimovla çörək kəsirik, dostluq edirik və ailəvi dostuq. Mənim əsgərlik dostum olub Kəmalədin Zərbəliyev, o, indi İqtisad Universitetinin müəllmidir, onunla indi də dostluq edirəm. Mənim bu gün özümə dost bildiyim, yaxın bildiyim adamlar bunlardır. İndi onlar məni dost sayır-saymır deyə bilmərəm, amma mən onları özümə yaxın dost sayıram.

Aqil Aslan:
- Bildiyimiz qədər Kəbəni ziyarət etmisiniz, amma spirtli içki də içirsiniz. Bunu necə qiymətləndirirsiniz?

Hadi Rəcəbli:
- Mən istədim içməyim, amma alınmadı. Ona görə mən Həcc ziyarətinə getmirəm. Mənim imicim belədir, oturub-duram, yoldaşlıq edəm, çörək kəsəm. Məclislərdə olur ki, dostlarla yeyib-içirik. Amma mənim yadıma gəlmir ki, nə zamansa piyan olum, ağlımı, huşumu itirim. Mən həmişə dərəcəni gözləmişəm, hətta gənclik dövrümdən belə.

Pərviz Həşimli:
- Spikerlə münasibətləriniz necədir?

Hadi Rəcəbli:
- Spikerlə yoldaş olmuşuq, bir yerdə deputat yoldaşlığı etmişik. Munasibətlərimiz yaxşıdır, mən spikerin hörmətini saxlayanam. Hesab edirəm həm parlamentari kimi, həm insan kimi Oqtay müəllim ləyaqətli insandır.

Xətayi Əzizov:
- Elə olub ki, hansısa probleminizlə bağlı birbaşa Prezidentə müraciət edəsiniz?

Hadi Rəcəbli:
- Olmayıb. Bilirsiniz də, mənimdə evim var, mən də çətinliklə yaşamışam. Dörd uşağım və 41 kvadratmetrlik evim var idi Bakıda. Şəkinin birinci katibliyindən qayıtdım və ev şəraitimi düzəltdim. Uşaqlarımın 3-ü ailə qurub, bizdən ayrılıblar. Kişik oğlum mənimlə yaşayır. Bir dəfə yoldaşların biri mənə dedi ki, Prezidentə müraciət et, sənə də ev versinlər. Dedim, mənə ayıb olar. Deməzlər, bu boyda adı-sanı var, ağ saçları var, Prezidentdən ev istəyir. Amma biz Prezidentə  şəhid ailələrinin muavinəti məsələsi ilə bağlı müraciət etdik. Belə məsələlərlə bağlı müraciətlər olunub.

Elşad Eyvazlı:
- Hadi müəlim, deyilənə görə, Şəkidən gələndə oradan yaxşı qızıl da gətirmisiniz. Keçən gündü, belə bir şey olub?

Hadi Rəcəbli:
- Çox təssüf ki, belə fikirlər var. Bunu gərək məndən yox,  şəkililərdən soruşaydınız. Mən Şəkidə işlədiyim vaxt soyğunçuluq eləməmişəm .

Zülfüqar Hüseynli:
- Müxalifət liderlərinin hansısa birinin xeyir-şərinə getmisiniz?

Hadi Rəcəbli:
- Yaslarına getmişəm, xeyir işləri yadıma gəlmir.

Elşad Eyvazlı:
- Müxalifətin fəaliyyətini necə qiymətləndiririsiniz?

Hadi Rəcəbli:
- Əlbətdə,  bu gün ləyaqətinə görə parlamentdə bəzi müxalifətdən sayılan o adamlarla münasibətim var. Bəzən onların qaldırdığı məsələlər həqiqətə yaxın olur. Məsələn, bir deputat deyir ki, Sumqayıtda kimya zavodnda fəhlələri işdən çıxarıblar, əməkhaqlarını vermirlər. Yalan danışmır, düz deyir də. Pənah Hüseyn son iclasların birində dedi ki, FövqəadəHallar Nazirliyi yaxşı işləyir, o, bu zaman ədalətli danışdı. Bu gün Pənah Hüseynkəskin müxalifətçi olduğu üçün yaxşı şeyləri görmək istəmir.

Zülfüqar Hüseynli:
- Hadi müəllim, 15 ildir belə bir ənənə var var ki , seçkilərə bir ay qalmış pensiya və müavinətləri artırırlar. Olmazmı ki, bunu heç olmasa üç ay qabaq artırsınlar?

Hadi Rəcəbli:
- Əlbəttə, proseslər gedir, hakim partiya addımlar atır. Siyasi fəallıq ümümiyyətlə seçki ərəfəsində artır. Prezident seçkisində cəmiyyətdə siyasi fəallıq artır, parlament seçkiləri ərəfəsində bu siyasi fəallıq daha da artır. Amma insanların sosial rifahinin yüksəldilməsi həmişə davan edən bir prosesdir.

Elşad Eyvazlı:
- Qarşıdan parlament seçkiləri gəlir bununla bağlı düşüncələriniz necədir?

Hadi Rəcəbli:
- Biz mojaritar sistemdəyik. Mojaritarda da namizədlərə partiya dəstək verir. Bu baxımdan bir partiya üzvü olaraq mən seçkiyə qatıla bilərəm o halda ki, məni partiya dəstəkləsin.


 

 


Hazırladı Mail Ağaxanov  

 

Telegram
Hadisələri anında izləyin!
Keçid et
Ukraynadan Rusiyaya ardıcıl zərbələr: Vəziyyət kritikdir