Azərbaycan İnternet Forumu (AİF) bildirib ki, dünən axsam saat 22.30 -dan etibarən Bakinternet Provayderinin müştəriləri internetdən istifadə edə bilməyiblər.
Modern.az AİF-ə istinadla bildirir ki, Bakinternet-in nə internet xidməti, nə 155 nömrəli “qaynar xətti”, nə də saytı səhər saatlarınadək isləyib. Bu müddət ərzində adı çəkilən provayderlə əlaqə yaratmaq mumkun olmayıb. Qabaqcadan istifadəçilərə bu haqda internet və ya KIV vasitəsilə heç bir xəbərdarlıq verilməyib.
AİF bildirir ki, hadisədən sonra Bakinternet dövlət provayderi baş verənləri öz daxili informasiya sistemlərində yenidənqurma işlərinin aparılması, yeni avadanlıqların (router`in – yönləndiricinin) işə salınması və bununla bağlı müəyyən problemlərin yaranması ilə izah edib.
AIF bəyan edib ki, ölkənin internet bazarında ən böyük paya malik olan dövlət provayderi tərəfindən istifadəçilərə qarşı bu cür məsuliyyətsiz və sayğısız münasibət göstərilməsi yolverilməzdir. “Qabaqcadan xəbərdarlıq edilmədən aparılan işlər nəticəsində istehlakçıların hüquqları kobudcasına pozulub”.
AİF bildirir ki, Bakinternet rəhbərliyinin bu məsuliyyətsizliyi nəticəsində vətəndaşların normal informasiya münasibətləri pozulmuş, 10 minlərlə istifadəçi informasiya azadlığı hüququnu gerçələşdirə bilməmişdir. AİF bu dövlət provayderinin tabe olduğu Rabitə və İnformasiya Texnologiyaları Nazirliyinin baş verən hadisəyə aydınlıq gətirməsini və rəsmi münasibət bildirməsini vacib hesab edir.
Modern.az