Modern.az-ın xarici KİV-nə istinadən verdiyi xəbərə görə, martın 19-da ABŞ-ın Mayami şəhərində həbs olunan iş adamı Rza Zərrabın işi ilə bağlı dəyişiklik olub.
Zərrabın Mayamidəki müvəqqəti vəkili Lee Stapleton ötən gün məhkəməyə ərizə təqdim edərək, aprelində 4-də keçiriləcək məhkəmə prosesinin təxirə salınmasını tələb edib.
Mayami prokuroru James Hayes vəkilin təqdim etdiyi ərizəyə etiraz etməyib.
Bunun ardınca hakim Edvin Torres ərizəni həmin gün qəbul edib və beləliklə, 4 aprel tarixində baş tutacaq məhkəmə prosesi ləğv olunub.
Twitter-də qərara dair sənədi yayımlayan baş prokuror Preet Bharara “Rza Zərrab Floridadakı məhkəmə prosesindən imtina etdi, bundan sonrakı əməliyyatlar üçün Nyu-Yorka nəql ediləcək” deyib.
Qeyd edək ki, ABŞ-ın Mayami şəhərində saxlanılan Rza Zərrab İrana qarşı sanksiyaları pozmaqda, beynəlxalq miqyaslı qeyri-leqal pul transferində və saxtakarlıqda ittiham edilir.
İran azərbaycanlısı Rza Zərrab Türkiyənin məşhur müğənnisi Ebru Gündeşlə evlidir. Onların bir qızları var.
Ağa AKİFOĞLU
