ADY Şimal-Cənub Beynəlxalq Nəqliyyat Dəhlizinin inkişafı, bu marşrutla yükdaşıma həcminin artırılması üçün işlər görür, eyni zamanda ölkə ərazisində bu dəhlizin keçdiyi mövcud infrastrukturu yeniləyir.
Şimal-Cənub Beynəlxalq Nəqliyyat Dəhlizinin Azərbaycan ərazisindən keçən hissəsinin mühüm seqmentlərindən olan Sumqayıt–Yalama dəmir yolu xəttinin layihələndirilməsi və tikintisi işlərinin icrasına 2020-ci ildən başlanılıb, sözügedən işlərin 2025-ci ildə başa çatdırılması planlaşdırılır.
Bu barədə Modern.az-ın sorğusuna cavab olaraq "Azərbaycan Dəmir Yolları" QSC-dən məlumat verilib.
Sumqayıt–Yalama dəmir yolu xəttinin layihələndirilməsi işləri tamamlanıb, xəttin birinci və ikinci hissəsi üzrə tikinti-quraşdırma işlərinin 96 faizi tamamlanıb.
Sumqayıt–Yalama dəmir yolu xəttinin ox üzrə uzunluğu 333,69 km, yan yollarla birlikdə isə 362,12 km təşkil edir.
Dəmir yolu xətti boyunca mühəndis qurğularının sayı: körpülər – 157 ədəd, heyvan keçidi – 16 ədəd, piyada üst keçidi – 13 ədəd və digər.
Bundan başqa, Yalama-2 stansiyasının tikintisi nəzərdə tutulur. Yalama 2 stansiyası Rusiya ilə sərhəddə və mövcud Yalama stansiyasına yaxın ərazidə yerləşir, xüsusi əhəmiyyətə malikdir.
Layihə çərçivəsində Yeni Ələt stansiyasının yenidən qurulması və genişləndirilməsi də planlaşdırılır.
