Müdafiə Nazirliyi martın 15-də Ankarada Azərbaycan və Türkiyə arasında hərbi/mülki heyətin mübadiləsinə dair imzalanan protokolla bağlı yayılan məlumatlara aydınlıq gətirib. Modern.az xəbər verir ki, bu barədə APA-ya nazirliyin mətbuat xidmətindən məlumat verilib.
Məlumata görə, martın 15-də Ankara şəhərində Azərbaycanla Türkiyə arasında hərbi/mülki heyətin mübadiləsinə dair imzalanan protokolu şərh edən bəzi elektron kütləvi informasiya vasitələri məsələyə qeyri-ciddi yanaşıb. "Sənədə əsasən, yüksək rütbəli zabitlərin qarşılıqlı olaraq hər iki dövlətin hərbi qurumlarında xidmət etməsi fikri tamamilə yanlışdır.
Bununla belə, ikitərəfli əməkdaşlıq planına uyğun olaraq 2015-ci ildən başlayaraq rəhbər heyət qarşılıqlı surətdə taktiki səviyyədə Azərbaycan və Türkiyədə təcrübə mübadiləsi məqsədilə qısamüddətli hərbi xidmət keçir. Bu döyüş hazırlığının artırılması və bölmələrin uzlaşması məqsədilə həyata keçirilən təlim prosesidir", - deyə məlumatda bildirilir.
Modern.az
