Bakının Sabunçu rayonu ərazisində məktəbliləri daşıyan mikroavtobusun qəzaya uğraması nəticəsində 12 nəfər xəsarətlə 3 saylı Şəhər Klinik Xəstəxanasının qəbul şöbəsinə müraciət edib. Bu barədə Trend-ə 3 saylı şəhər Klinik Xəstəxanasından məlumat verilib.
Bildirilir ki, xəsarət alanlardan 10 nəfər 8-17 yaşlı məktəb şagirdi olub. Şagirdlərdən əlavə, hadisə nəticəsində avtobusda olan daha iki nəfər - 23 və 52 yaşlı şəxslər də xəsarətlə xəstəxanaya müraciət ediblər.
Xəstəxanada həmin şəxslərə ilkin tibbi yardım göstəriləndən sonra 12 nəfərin hamısı evə buraxılıb.
Məlumatda qeyd olunur ki, hadisə zamanı xəsarət alanlar hamısı Sabunçu rayonunun Maştağa qəsəbəsindəki orta məktəblərin şagirdləri olub. Şagirdlər mikroavtobusla Kürdəxanı qəsəbəsindən Maştağadakı orta məktəbə gedirmiş.
Faktla bağlı Sabunçu rayon Polis İdarəsində araşdırma aparılır.
Modern.az
