“Azərbaycan Hava Yolları” QSC-nin (AZAL) J2-8243 nömrəli Bakı-Qroznı reysini yerinə yetirən “Embraer 190” təyyarəsi Aktau şəhərinin 3 km yaxınlığında qəza enişi edib.

Təyyarənin göyərtəsində 62 sərnişin, 5 ekipaj üzvü olmaqla, ümumilikdə 67 nəfər olub. Təyyarədə olan sərnişinlər arasında 37 Azərbaycan vətəndaşı olub, onlardan 23-ü həyatını itirib.

Elə həmin gün  AZAL-a məxsus sərnişin təyyarəsi Qazaxıstanın Aktau şəhərində qəzaya uğraması ilə əlaqədar Prezident İlham Əliyevin sərəncamı ilə 26 dekabr Azərbaycanda matəm günü elan edilib. 

Bəs xaricdəki diasporlarımız bu günlə bağlı hansı tədbirləri həyata keçirib?

Rusiyadakı diaspor nümayəndəmiz Şahin Məmmədov bildirib ki, matəm günü ilə əlaqədar Vladiqafqazdakı azərbaycanlılar tədbir keçiriblər:

"Vladiqafqaz şəhərində yaşayan bütün azərbaycanlılar matəm günü ilə əlaqədar bütün gün tədbir keçirdi. Təyyarə qəzasında həyatını itirənlərin yaxınlarına,Azərbaycan Respublikasının Prezidenti cənab İlham Əliyeva,  Diaspor Komitəsinin sədri Fuad Muradova teleqram vuraraq, başsağlığı verdik. Hər birimiz Azərbaycan xalqının yanındayıq, onların acısını bölüşürük".

İsveç azərbaycanlılarının Koordinasiya Şurası idarə heyətinin sədri İradə Əliyeva Söderberg isə bunları deyib: 

"Bu xəbər hamımızı çox kədərləndirdi. Xalqımıza, dövlətimizə dərin hüzrlə başsağlığı veririk, həlak olanların yaxınlarına səbr diləyirik, yaralananların tezliklə sağalıb ailələrinə qovuşmasını arzulayırıq.

Bildiyiniz kimi bu günlər İsveçdə istirahət günləridir və hər kəs öz ailəsi ilə vaxt keçirməyi planlaşdırıb. Fiziki olaraq belə bir qısa müddətdə hansısa bir matəm tədbiri planlaşdırmaq çətindir. Sosial şəbəkələrimizdə, əlaqədə olduğumuz qurumlarda məlumatlar paylaşırıq. Bizimlə əlaqə saxlayan, daha dəqiq məlumat almaq istəyənlərə cavab veririk. Qəzanın səbəblərinin açıqlanmalarını diqqətlə izləyirik.

Əlbəttə ki, biz də heç bir bayram tədbiri keçirmirik. Allah xalqımızı, millətimizi qorusun!".