Vaşinqton və onun müttəfiqləri MDB məkanında xaos yaratmaq və Birlik məkanını ucuz resurs bazasına çevirmək istəyirlər.

Modern.az “RİA Novosti”yə istinadən xəbər verir ki, bunu Rusiya Federal Təhlükəsizlik Xidmətinin (FTX) direktoru Aleksandr Bortnikov bildirib.

“ABŞ və müttəfiqləri geosiyasi ambisiyalarını həyata keçirmək üçün ən çirkin üsullardan istifadə etməkdən çəkinmirlər”, - Bortnikov MDB ölkələrinin təhlükəsizlik orqanlarının və kəşfiyyat xidmətləri rəhbərlərinin Moskvada keçirilən müşavirəsində bildirib.

Rusiya Xarici Kəşfiyyat Xidmətinin direktoru Sergey Narışkin də toplantıdakı çıxışı zamanı bu məsələyə toxunub. O deyib ki, ABŞ və onun avropalı müttəfiqləri Ukrayna ssenarisini həyata keçirmək üçün Müstəqil Dövlətlər Birliyi (MDB) ölkələrindəki millətçilərlə əlaqə saxlayırlar.

“Vaşinqton, London və Brüsseldə ayrı-ayrı Birlik ölkələrinə Ukrayna ssenarisini tətbiq etmək variantlarını araşdırırlar. Bu, milli kimliyin gücləndirilməsi bəhanəsi ilə millətçiliyi qızışdırmaq və Qərblə inteqrasiyaya təkan vermək deməkdir. Amerika və Avropanın xüsusi xidmət orqanlarının MDB-dəki millətçi partiyalar və hərəkatlarla sabit əlaqələri barədə məlumatlar var”, - Narışkin qeyd edib.