Vaşinqton Suriyada Bəşər Əsəd rejimini devirən “Heyət Təhrir əl-Şam” (HTŞ) qruplaşmasını terror təşkilatları siyahısından çıxarmaq imkanını nəzərdən keçirir.

Modern.az xəbər verir ki, bu barədə Amerika rəsmisi xüsusi brifinqdə bildirib.

Onun sözlərinə görə, Suriyadakı siyasi transformasiyada müxtəlif qrup və təşkilatlar iştirak edir, “Heyət Təhrir əl-Şam” isə bu prosesin mühüm tərkib hissəsidir.

Vaşinqton rəsmisi ABŞ-ın qruplaşma ilə Amerikanın maraqlarına uyğun şəkildə əlaqə qurmağı planlaşdırdığını da əlavə edib. Lakin o qeyd edib ki, “Heyət Təhrir əl-Şam” qruplaşmasının terror təşkilatları siyahısında qalıb-qalmaması ilə bağlı hazırda şərh verə bilməz.

"Gələcəkdə bu məsələyə baxacağıq", - o deyib.

ABŞ rəsmisi həmçinin bildirib ki, “Heyət Təhrir əl-Şam”ın müəyyən bəyanatlarının icra edilib-edilməyəcəyini qiymətləndirmək vacib olacaq. O qeyd edib ki, “Həyat Təhrir əl-Şam” hələ ki düzgün bəyanatlar verir və hazırda düzgün hərəkət edir.

Xatırladaq ki, ABŞ HTŞ-ni 2017-ci ilin martında terror təşkilatı kimi tanıyıb.