Amerikanın nüfuzlu “Politico” jurnalı 15 futuroloq, alim və analitik arasında sorğu aparıb və 2025-ci ildə dünyada vəziyyəti dəyişə biləcək hadisələrin siyahısını tərtib edib.

Modern.az-ın məlumatına görə, jurnal bu hadisələri “Qara qu quşları” adlandırıb. 

Qeyd edək ki, bu termini amerikalı politoloq Nassim Taleb irəli sürüb.

Nəşr qeyd edir ki, 2025-ci ilin daha sakit olacağını düşünmək üçün heç bir səbəb yoxdur.

Jurnalda dərc edilən məqalədə iddia edilir ki, bu il tarixin ən böyük kiberhücumları ola bilər. Ekspertlərin sözlərinə görə, generativ süni intellekt getdikcə populyarlaşır və ucuzlaşır, bu, kiberhücumçular üçün mükəmməl vasitədir. Həmçinin, kiberhücum zamanı kod yazmaq üçün artıq süni intellekt istifadə edilə bilər. Mütəxəssislər kiberhücum nəticəsində bazarın çökməsi barədə xəbərdarlıq edirlər.

Bu il İranın nüvə silahı inkişaf etdirməsini dayandırmaq üçün gizli razılaşma əldə edilə bilər.

2025-ci il üçün “qara qu quşları” siyahısına enerji təhlükəsizliyi böhranı, ABŞ-da genişmiqyaslı epidemiya və iqlim dəyişikliyi ilə bağlı risklər daxildir.

Jurnal ABŞ daxilində Donald Trampın daxili siyasəti və dövlət sərhədlərində mümkün dəyişikliklərlə bağlı toqquşmaların olacağını proqnozlaşdırır.

İqtisadçılar Çinin ABŞ-la gələcək ticarət müharibələrində silahlandıra biləcəyi alət olaraq artan süni intellekt imkanlarının yaratdığı çoxsaylı təhlükələr barədə xəbərdarlıq ddiblər.

Ehtimal edilən siyasi təlatümlər arasında jurnal Tramp və Si Cinpinq arasında mümkün ittifaqdan, Cənubi Koreyanın öz nüvə arsenalının gizli yaradılmasından bəhs edir.

Jurnal 2025-ci ildə dünya təhlükəsizliyinə əsas təhdidləri nüvə silahının hərbi məqsədlər üçün mümkün istifadəsi ilə əlaqələndirir. Eyni zamanda, ekspertlər İsrail-Fələstin münaqişəsinin həlli ilə bağlı heç bir nikbinlik ifadə etmirlər. Siyasi analitiklər, həmçinin Belarusda mümkün çevriliş və Svetlana Tixanovskayanın hakimiyyətə gəlməsi ilə bağlı fərziyyələr irəli sürüblər.