İranın xarici işlər naziri Abbas Araqçının həyat yoldaşı sosial şəbəkələrdə və İran mətbuatında müzakirələrə səbəb olub.
Modern.az-ın məlumatına görə, 62 yaşlı nazirin İran Xarici İşlər Nazirliyinin Qadın Diplomatik Assosiasiyasının xeyriyyə bazarına səfəri zamanı çəkilmiş şəkilləri yayılıb.
Fotolarda onun özündən xeyli gənc həyat yoldaşı görünüb. İran mətbuatı bildirir ki, Arzu Əhmədvand 30 yaşındadır. O, Araqçının ikinci həyat yoldaşıdır.
Məsələyə İranın xarici işlər nazirinin müşaviri Məhəmməd Hüseyn Rəncbəran da münasibət bildirib. O, xanımın nazirin ikinci həyat yoldaşı olduğunu təsdiqləyib. Müşavirin sözlərinə görə, onlar təxminən 6 il yarım əvvəl ailə həyatı qurublar və bu evlilikdən üç yaş yarımlıq qızları var.
Abbas Araqçı birinci həyat yoldaşından boşanıb. Onun birinci həyat yoldaşı rəssamlıq sahəsində çalışan və İranın rəssamlıq professorlarından biri olan Bahare Abdullahian olub.
Qeyd edək ki, Araqçı 1962-ci ildə Tehranda anadan olub. O, Xarici İşlər Nazirliyinin Beynəlxalq Münasibətlər Məktəbinin fakültəsinin beynəlxalq münasibətlər üzrə bakalavr dərəcəsinə, İslami Azad Universitetinin siyasi elmlər üzrə magistr dərəcəsinə və Kent Universitetində siyasi fikir üzrə doktorluq dərəcəsinə malikdir.
O, 1989-cu ildə diplomatik xidmətə başlayıb. O, 1990-cı illərin əvvəllərində Səudiyyə Ərəbistanının Ciddə şəhərində yerləşən İran İslam Respublikasının İslam Konfransı Təşkilatı yanında Daimi Nümayəndəliyinin müvəqqəti işlər vəkili, Finlandiya (1999-2003) və Yaponiyada (2007-2011) səfir vəzifələrində çalışıb.
Səfir olmamışdan əvvəl Araqçı Siyasi və Beynəlxalq Araşdırmalar İnstitutunun (IPIS) baş direktoru vəzifəsində çalışıb. 2004-2005-ci illərdə Beynəlxalq Münasibətlər Məktəbinin rektoru olub.
