Fələstinin HƏMAS hərəkatı və İsrail Qəzza sektorunda atəşkəs rejimi və girov mübadiləsi ilə bağlı danışıqları uğurla başa çatdırmağa çox yaxındır.
Modern.az xəbər verir ki, “The Wall Street Journal” qəzetinin mənbələrinin sözlərinə görə, tərəflər artıq sazişin əsas bəndləri üzrə razılığa gəliblər və atəşkəs rejimi yanvarın 14-də elan oluna bilər.
Bir müddət öncə “Associated Press” agentliyi ABŞ-dan və ərəb ölkələrindən olan vasitəçilərin atəşkəs sazişinin bağlanması istiqamətində əhəmiyyətli irəliləyişə nail olduqları barədə məlumat yaymışdı. Məlumata görə, HƏMAS və İsrail nümayəndələri yanvarın 13-də tərtib edilən saziş layihəsini nəzərdən keçirmək və təsdiqləmək üçün liderlərinə təqdim edəcəklər. Danışıqlarda iştirak edən tərəflər ABŞ-ın yeni seçilmiş Prezidenti Donald Trampın yanvarın 20-nə planlaşdırılan andiçmə mərasiminədək atəşkəs barədə razılığa nail olmağa çalışacaqlar.
Xatırladaq ki, 2023-cü il oktyabrın 7-də HƏMAS hərəkatı İsrailin nəzarətində olan ərazilərə hücum edib. Hücum nəticəsində 1,2 mindən çox israilli ölüb və 240 nəfər girov götürülüb. Buna cavab olaraq İsrail ordusu Qəzzada hərbi əməliyyatlara başlayıb.
