İsrailin Ədliyyə Nazirliyi şənbə günü təsdiqlənmiş Qəzzada atəşkəs və əsir mübadiləsi razılaşmasının birinci mərhələsi çərçivəsində 737 fələstinli məhbusun azad ediləcəyini bildirib.

Modern.az xəbər verir ki, Ədliyyə Nazirliyinin məlumatına görə, hökumət hazırda həbsxana xidmətinin nəzarətində olan 737 fələstinli məhbusun azad edilməsini təsdiqləyir.

Nazirlik bazar günü yerli vaxtla saat 16:00-dan sonra sərbəst buraxılacaq kişi, qadın və uşaqların adlarını açıqlayıb.

Nazirlik daha əvvəl Qəzzadakı israilli əsirlərin müqabilində azad edilməli olan, əksəriyyəti qadınlar olmaqla, 95 fələstinli məhbusun siyahısını dərc edib.

Genişləndirilmiş siyahıda olanlar arasında Fələstin prezidenti Mahmud Abbasın Fəth partiyasının silahlı qanadının rəhbəri Zəkəriyyə Zubeydi də var.

Zubeidi 2021-ci ildə digər beş fələstinli ilə birlikdə İsrailin Gilboa həbsxanasından qaçaraq günlərlə davam edən axtarışlara səbəb olub və fələstinlilər tərəfindən qəhrəman kimi qəbul edilib.

Həmçinin İsrailin dəfələrlə həbs etdiyi fələstinli deputat Xalidə Carar da azad ediləcək.

Xalidə Carar İsrail, ABŞ və Avropa İttifaqı tərəfindən "terror təşkilatı" kimi tanınan Fələstinin Azadlığı Xalq Cəbhəsinin tanınmış üzvüdür.

Bu arada HƏMAS-a yaxın iki mənbə bildirib ki, onların azad edəcəyi ilk girovlar qrupunda üç İsrail əsgəri də var.

AFP-nin əldə etdiyi ilk mərhələdə azad ediləcək 33 girovluq siyahısında ilk üç ad Həmas hücumu günü orduda xidmət etməyən 30 yaşdan kiçik qadınlardır.

Ədliyyə Nazirliyinin sözçüsü Noqa Katz bildirib ki, ilk mübadilədə azad ediləcək məhbusların yekun sayı Həmas tərəfindən azad edilən canlı girovların sayından asılı olacaq.