Qazaxıstan Nəqliyyat Nazirliyi tərəfindən Aktau yaxınlığında Azərbaycana məxsus təyyarənin qəzaya uğraması barədə hesabat yayımlanıb. 53 səhifəlik hesabatda təyyarənin qəzadan əvvəl kənar müdaxiləyə məruz qaldığı təsdiqlənib.

Azərbaycan hökumətindəki rəsmi mənbə "Reuters" agentliyinə bir sıra yeni faktlar açıqlayıb. Açıqlamada bildirilib ki, Azərbaycan təyyarəsi Rusiyanın "Pantsir-S" raketi ilə vurulub. “Azərbaycan tərəfində təyyarədən çıxarılan və beynəlxalq ekspertiza nəticəsində müəyyən edilmiş “Pantsir-S” raketinin qəlpəsi var”, - mənbə bildirib.

Modern.az-ın məlumatına görə, Rusiya tərəfi hələlik hesabatla bağlı susmağa üstünlük verib. Kremlin nəzarətində olan media orqanları hesabatla bağlı ötəri məlumatlar təqdim ediblər.

Moskvanın "RT" təbliğat orqanı aviasiya dairələrindəki naməlum mənbəyə istinadən yazıb ki, Rusiya hələ də Aktau yaxınlığında qəzaya uğrayan AZAL təyyarəsinin korpusunda tapılan elementlərin nümunələrini almayıb.

Bildirilir ki, bəzi xarici KİV-lərin bu elementlərin “Pantsir” hava hücumundan müdafiə raket sisteminin parlaq elementləri olması barədə açıqlamaları əlavə araşdırma və ekspertiza tələb edir.

"Qazaxıstan hökumət komissiyasının hesabatında bu elementlər müəyyən edilməyib. Bununla belə, onların mənbəyinin daha da öyrənilməsinə ehtiyac var", - açıqlamada deyilir. Rusiya hakimiyyətinin nəzarətində olan politoloqlar da məsələyə münasibət bildirməyə tələsməyib. Onlar hələlik araşdırmanın yekun nəticələrini gözləməyi təklif edib.

Beləliklə, görünür, Rusiya hələlik faktı etiraf etmək və təyyarənin vurulmasına görə üzr istəmək niyyətində deyil.