Bir həftə tarixi proseslərin gedişatında bir göz qırpıdır, siyasətdə isə bir ömür qədər uzun hesab edilir.

Amma son bir həftədə baş verənlər dünyanının az qala gedişatını dəyişib.

Donald Tramp və Vladimir Putin həftə içində planetin siyasi temperaturunu yüksəldiblər.

Hər şey Tramp-Putin telefon danışığı ilə başladı. Münhen Təhlükəsizlik Konfransı Qərbdəki siyasi çatları daha da dərinləşdirdi. Ər-Riyadda Rusiya-ABŞ diplomatiyasının ilk real addımı atıldı.

Avropa və Ukrayna hadisələri izləyir və narahatdırlar.

Kremlin planı isə bəllidir – təcrid olunmadığını sübut etmək və dünyaya “biz hələ də burdayıq” mesajı vermək.

BBC deyir ki, Moskva bazarlarında Putin və Trampın matryoşka kuklaları gözə dəyir. Rusiya mediası Vaşinqtonu alqışlayır, Avropanı tənqid edir. Trampın “iş adamı” olduğunu xatırladan ruslar ehtiyatlı sözlər istifadə edirlər, ancaq nikbindirlər.

Kiyev küçələri daha "sakitdir". Ukraynalılar Qərbin onları yalnız qoyub-qoymadığı barədə düşünür. Hər gün raket hücumlarının kölgəsində yaşayan ukraynalılar üçün Tramp-Putin anlaşması sülh, yoxsa xəyanət deməkdir?

Post-sovet ölkələrinin sakinləri də bu həftəni maraqla izlədi. Baltikyanı ölkələrdə qorxu artır – “Növbəti hədəf bizik?” Mərkəzi Asiya yeni dünya düzəninindən necə istifadə edə biləcəklərini düşünürlər.

Cənubi Qafqaz ölkələrində isə diqqət başqa məsələlərə yönəlib. Bəziləri böyük güclərin yeni “razılaşmalarının” regiona təsirindən narahatdır, digərləri isə dünyanın daha stabil olacağına ümid edir.

Beləliklə, bir həftə içərisində dünya dəyişdi. Amma necə? Müsbət, yoxsa mənfi. Bu sualın cavabını yaxın günlərdə biləcəyik…