PKK terror təşkilatının həbsdə olan lideri Abdullah Öcalan tərəfdarlarını silahları yerə qoymağa və özünü buraxmağa çağırıb. Öcalan bu çağırışının tarixi məsuliyyətini üzərinə götürdüyünü vurğulayıb.
Məktubda Türkiyə Prezidenti Rəcəb Tayyib Ərdoğan və MHP lideri Dövlət Baxçalının bu məsələyə münasibətinin müsbət olduğu bildirilib. Öcalan PKK-nın qurultay keçirərək dövlət və cəmiyyətlə inteqrasiya üçün qərar qəbul etməsinin vacibliyini qeyd edib.
Modern.az xəbər verir ki, çağırış yalnız Türkiyə daxilində deyil, bir çox ölkədə də geniş əks-səda doğurub.
Türkiyə Prezidenitinin müşaviri Mehmet Uçum açıqlamasında Öcalanın bəyanatının dövlətin müəyyən etdiyi çərçivəyə uyğun olduğunu bildirib. O, bu prosesin Türkiyənin bölünməsinin qarşısını aldığını vurğulayıb. AKP-nin sədr müavini Efkan Ala da çağırışın əhəmiyyətini qeyd edib: “Biz nəticəyə baxacağıq. PKK silahı buraxacaqmı, bunu izləyəcəyik".
Müxalifət partiyaları da məsələyə münasibəti fərqli olub. CHP lideri Özgür Özel terrorun tamamilə bitməsini arzuladıqlarını söyləyib. DEVA Partiyası sədri Əli Babacan PKK-nın silah buraxmasını tarixi bir addım kimi dəyərləndirib. Gələcək Partiyasının lideri Əhməd Davudoğlu isə bu prosesin parlament çərçivəsində aparılmasının vacibliyini vurğulayıb.
Milliyyətçi dairələrdən isə fərqli fikirlər səslənib. İYİ Partiya lideri Müsavat Dervişoğlu bu prosesin Türkiyənin siyasi sisteminə təsir edə biləcəyini bildirib. O, prosesdən narazılığını ifadə edib. Zafer Partiyasının rəsmiləri isə bunun dövlətə qarşı bir təzyiq kimi təqdim olunduğunu iddia ediblər.
Vətən Partiyasının lideri Doğu Perinçek də bu çağırışı müsbət addım adlandırıb.
Beynəlxalq reaksiyalar da gecikməyib. Ağ Evinin rəsmiləri bu çağırışı müsbət qiymətləndirərək, bölgədə sabitliyə töhfə verə biləcəyini bildiriblər. "Reuters"in məlumatına görə, ABŞ rəsmiləri bu addımın Suriya və İraqdakı qüvvələrə də təsir edəcəyini düşünürlər.
PKK-nın Suriyadakı qanadı olan Suriya Demokratik Qüvvələrinin (SDG) komandanı Mazlum Kobani də açıqlama verib. O, PKK-nın bu addımının bölgəyə təsir edə biləcəyini, lakin SDG-nin bunun bir hissəsi olmadığını iddia edib. PYD və YPG-nin rəsmiləri isə problemin müzakirə yolu ilə həll edilməsinə üstünlük verdiklərini qeyd ediblər.
İraq Xarici İşlər Nazirliyi Öcalanın çağırışına müsbət reaksiya verib, bunu bölgədə sabitliyə doğru atılan bir addım kimi qiymətləndirib. Almaniya Xarici İşlər Nazirliyi Öcalanın təşkilatın ləğvi ilə bağlı çağırışını “tarixi fürsət” kimi qiymətləndirib və hadisələrin Türkiyə üçün “önəmli bir addım olacağını” vurğulayıb.
Ümumilikdə, Öcalanın bu açıqlaması Türkiyədə və beynəlxalq arenada diqqətlə izlənir. PKK-nın və digər qrupların bu çağırışa necə reaksiya verəcəyi isə yaxın günlərdə bəlli olacaq.
Bəzi ekspertlər çağırışın nəticə verməcəyini düşünür, ancaq müsbət nəticə gözləyənlər də az deyil.
