Londonda Ukrayna ilə bağlı sammitin yekunlarına dair mətbuat konfransı keçirilib.

Modern.az xəbər verir ki, Böyük Britaniyanın Baş naziri Kir Starmer liderlərin yaxın zamanda yenidən görüşmək barədə razılığa gəldiklərini açıqlayıb.

Onun sözlərinə görə, məqsəd "hərəkət tempini qorumaq" və ümumi plan üzərində işi davam etdirməkdir.

Starmer çıxışında dünya liderlərinin ciddi bir seçim qarşısında olduğunu vurğulayıb:

"Bu gün biz tarixin dönüş nöqtəsindəyik. Artıq boş danışmağın vaxtı deyil – hərəkət etmək və ədalətli, dayanıqlı sülhün əldə olunması üçün yeni plan ətrafında birləşmək zamanıdır."

Böyük Britaniya, Fransa və digər ölkələrin Ukrayna ilə birgə atəşkəs planı üzərində işlədiklərini bildirən Starmer qeyd edib ki, bu plan ABŞ ilə da müzakirə olunacaq və müttəfiqlər tərəfindən birlikdə icra ediləcək.

Starmer Britaniya hökumətinin Ukraynaya 1,6 milyard funt sterlinq dəyərində maliyyə ayıracağını açıqlayıb. Bu vəsait Ukraynanın beş mindən çox hava hücumundan müdafiə raketi almasına imkan yaradacaq. Həmin raketlər Şimali İrlandiyanın Belfast şəhərində istehsal olunacaq ki, bu da Böyük Britaniyanın müdafiə sənayesində yeni iş yerlərinin açılmasına töhfə verəcək.

Baş nazir vurğulayıb ki, bu addım Ukraynanın danışıqlara daha güclü mövqedən oturmasına kömək edəcək.

O qeyd edib ki, sammitdə razılaşdırılan dörd əsas addım aşağıdakılardır:

1. Ukraynaya hərbi yardım davam edəcək – Müharibə bitənə qədər Kiyevə dəstək göstəriləcək, eyni zamanda Rusiyaya qarşı iqtisadi təzyiqlər artırılacaq.

2. Ukraynanın suverenliyi təmin olunmalıdır – Hər hansı sülh razılaşması Kiyevin təhlükəsizliyini və suverenliyini qorumalı, Ukrayna müzakirələrin tamhüquqlu iştirakçısı olmalıdır.

3. Gələcəkdə mümkün işğalların qarşısı alınacaq – Avropa liderləri Rusiyanın Ukraynaya qarşı yeni hücumlarını əngəlləmək üçün tədbirlər görəcək.

4. "Könüllülər koalisiyası" yaradılacaq – Ukraynanın müdafiəsi və sülhün təmin olunması üçün xüsusi beynəlxalq koalisiya formalaşdırılacaq.

Starmer Avropa ölkələrinin Ukraynaya real dəstək göstərməli olduğunu vurğulayıb:

"Avropa çətin işi görməlidir. Biz Avropanın bu məsələdə üzərinə düşəni edəcəyini təmin edəcəyik. Amma bu plan ABŞ-ın dəstəyinə ehtiyac duyur."

Baş nazir həmçinin ABŞ-ın etibarsız tərəfdaş olması ilə bağlı fikirləri rədd edərək bildirib ki, Böyük Britaniya və ABŞ dünyada bir-birinə ən yaxın iki ölkədir:

"Mən ABŞ-ın etibarsız müttəfiq olduğu fikri ilə razı deyiləm. Biz birlikdə çalışırıq və bu plan ABŞ-la əməkdaşlıq çərçivəsində həyata keçiriləcək. Buna görə də dünən axşam Tramp ilə danışdım."

Beləliklə, Londondakı sammitdə Ukraynaya dəstəyin artırılması və uzunmüddətli sülhün təmin olunması üçün ciddi qərarlar qəbul edilib. Qarşıdakı aylarda bu planların necə həyata keçiriləcəyi dünya siyasətində mühüm rol oynayacaq.