Ermənistanın baş naziri Nikol Paşinyan hökumətin bugünkü iclasında ordudakı problemlərə toxunub.

Modern.az Ermənistan KİV-nə istinadən xəbər verir ki, Paşinyan ordudakı problemlərə görə yalnız Müdafiə Nazirliyini ittiham etməklə razılaşmayıb:

“Orduda problem yarananda hamı Müdafiə Nazirliyini ittiham etməyə başlayır. Amma araşdırsaq görərik ki, bu problemlər orduda formalaşmayıb, mülki həyatdan hissə-hissə gəlib və orada yığılıb. Ona görə də cəmiyyətin bütün məsuliyyəti Müdafiə Nazirliyinin üzərinə qoyması ilə razı deyiləm", - Paşinyan qeyd edib.

Baş nazirin sözlərinə görə, orduda vəziyyəti dəyişmək artıq çox gecdir, çünki problemlər daha erkən, uşaq bağçası və məktəbdə başlayır. O vurğulayıb ki, Ermənistanın təhsil sistemi uşaqları psixoloji hazırlıqla təmin etmir, nəticədə onlar zəif iradəli və həyata hazırlıqsız böyüyürlər.
Paşinyan qeyd edib ki, bu problem ordu islahatlarından daha genişdir və o, məktəbəqədər təhsil müəssisələrindən başlayaraq bütün təhsil sistemi səviyyəsində həll edilməlidir.