58 yaşa təbrik...
Bu adam gözəl şairimiz, sağlığında çoxsaylı lətifələrin (əslində onların hamısı olmuş əhvalatlardır) qəhrəmanına çevrilmiş, hamının “müsbət enerji bloku” kimi qəbul etdiyi Qabil İmamverdiyevin oğlu, yazıçı-publisist Mahir Qabiloğludur.
O Mahir Qabiloğlu ki, mənim haqqımda qələmə alınmış məqalələrin ən yaxşılarından birinin müəllifidir. Telman Haqverdiyev, Vaqif Bayramov və Zərifə Bəşirqızının inciməyəcəyinə əminəm. Mahir Qabiloğlu “İttifaq Mirzəbəylinin iki zəngini” adlı yazısında mənim çoxlarının görə bilmədiyi bir cəhətimi qabartmağı bacarıb.
O Mahir Qabiloğlu ki, ölkənin qələm sahibləri arasında mənimlə çox açıq zarafat edən yeganə həmkarımızdır. Halbuki, mən dövlət radiosunda işləyərkən onun atasıyla dostluq eləmiş, badələr qaldırmış, altı-yeddi dəfə ölkədaxili səfərlərdə olmuşdum. Hələ bu az imiş kimi, tez-tez xatırladır ki, mən hörmətli qəbələlilərdən birini, çox sevdiyim iş yoldaşımızı, gözəl insanı bu tipli açıq zarafatlarla bezdirib "öldürmüşəm" (rəhmətlik diktor Hicran Hüseynovu nəzərdə tutur). Onu da əlavə edir ki, bəxtindən sən hörmətli qəbələli deyilsən.
O Mahir Qabiloğlu ki, dünyaya yazıçı kimi gəlsə də, həmin təbii qabiliyyətinə xəyanət edərək jurnalist ixtisasını və peşəsini seçmişdir. Öz yoluna qayıdandan sonra isə bir neçə mükəmməl nəsr əsəri yaratmışdır. Çox təəssüf ki, oradakı uğurları, eşitdiyi təriflər onu çaşdırmış, nəsr əsərlərindən birində Azərbaycan oxucusunun qarşısına çıxarılmasını məqsədəuyğun saymadığımız səhnələrə və ifadələrə yol vermişdir. Məhz həmin səbəbdən də üç-dörd il qabaq mənə təqdim etdiyi növbəti əsər haqqında hazırlayacağım yazını… yarımçıq saxlamışdım.
O Mahir Qabiloğlu ki, “Xalq qəzeti”nin 105 illiyi münasibətiylə tərtib etdiyim “Baş redaktorlarımız haqqında yazılanlar” adlı kitaba onun da bir yazısını daxil etmişəm. İstəsə gəlib baş redaktorun köməkçisindən götürə bilər. Qonaqlıq-zad da istəmirəm. Pensiyaya çıxıb, işdən ayrılıb Xırdalan qocalarının sırasına qoşulmuş adamın “qonaqlıq harasına yaraşır?”.
İttifaq Mirzəbəyli
