Prezident İlham Əliyev görkəmli şair Bəxtiyar Vahabzadənin 100 illiyinin qeyd edilməsi ilə bağlı sərəncam imzalayıb.
Qeyd edək ki, 2025-ci ilin avqust ayında mərhum Xalq şairi, dramaturq, ədəbiyyatşünas, pedaqoq və ictimai xadim, Azərbaycan Respublikasının Dövlət mükafatı laureatı Bəxtiyar Vahabzadənin anadan olmasının 100 ili tamam olur. Onun “Ana dili”, “Azərbaycan”, “Əsarət-azadlıq”, “Zaman” şeirləri yaddaşlarda iz buraxıb.
Bəs Bəxtiyar Vahabzadənin müasirləri onun 100 illiyinin necə qeyd edilməsini istəyir?
Bu haqda Bəxtiyar Vahabzadənin tələbəsi olmuş yazıçı, deputat Aqil Abbas fikirlərini Modern.az saytı ilə bölüşüb.
“Yəqin ki, Bəxtiyar Vahabzadənin 100 illiyi dövlət səviyyəsində, böyük tədbirlərlə qeyd ediləcək. Bunun üçün Mədəniyyət Nazirliyi konkret təkliflər verməlidir”, - deyə o bildirib.
Aqil Abbas onu da vurğulayıb ki, Bəxtiyar Vahabzadə Azərbaycan xalqının dövlət müstəqilliyini ən çox təbliğ edən şair və müəllim olub, tələbələrin, ümumilikdə xalqın sevimlisinə çevrilib.
“Prezidentin də Bəxtiyar Vahabzadənin 100 illiyinin qeyd edilməsi ilə bağlı sərəncamı bunun sübutudur. “Konstitusiya və Suverenlik İli” ilə əlaqədar Bakıda metro stansiyalarına yeni adlar verilməsi məsələsi Prezident İlham Əliyevin Sərəncamı ilə təsdiqlənən "Tədbirlər Planı"nda əksini tapıb. Mən təklif edərdim ki, Bəxtiyar Vahabzadənin adına metro stansiyası olsun. Metrotansiyalar məhz şairlərin, yaradıcı şəxslərin adına olmalıdır. Bəxtiyar müəllim də Azərbaycanın müstəqilliyini, suverenliyini istəyən şair idi, onun adı daim yaşamalıdır”.
