“Biz gərək dilimizdə, xüsusən də danışıqda təsadüfən işlədilən rus sözlərini də, məsələn, "vopşe", "tak çto", "znaçit" kimi sözləri də dilimizin lüğətinə daxil edək. Çünki bu sözlər artıq bizim leksikonumuzda var. Eyni zamanda mətbuatı vərəqləyib görsək ki, orada hələ də yayqın olmayan bir ingilis, fransız, ərəb, İndoneziya, hind sözü varsa, onu da lüğətə daxil edə bilərik. Məhz bu cür dildə sözlərin sayını artırmaq olur. Bir var əsas lüğət fondu, dilin lüğət tərkibi, bir də var ki, dilin lüğət tərkibində ehtimal olunan biləcək söz yaradıcılığı prosesləri. Çünki biz hər gün söz yarada bilirik. Dəmirçi sözü varsa, sabah, taxtaçı sözü də ola bilər. Yəni, bu potensialı da nəzərə almaq lazımdır”.

Modern.az-ın məlumatyına görə, Azərbaycan Atatürk Mərkəzinin direktoru, akademik Nizami Cəfərovun “Teleqraf”a verdiyi bu açıqlama ictimaiyyətdə birmənalı qarşılanmayıb.

Sosial şəbəkələrdə dilçi alimin fikirlərinə müxtəlif etirazlar ifadə edilib.

Filologiya üzrə fəlsəfə doktoru, dosent Şahlar Göytürk də Nizami Cəfərovun səsləndirdiyi fikirlə razılaşmayanlar sırasındadır.

"Hamıdan çox ayıq və məntiqi təfəkkürə malik olan dilçi alim"in sözügedən fikirlərinə bu dilin təəssübünü çəkən daha ayıq-sayıq vətəndaşlar haqlı olaraq kəskin etiraz edirlər. Lüğət tərtibetmənin öz prinsipləri mövcuddur. Sözləri təsnif etmək, qeydə almaq başqa məsələdir, amma tüfeyli sözlər, varvarizmlər hesabına dilimizi "zənginləşdirmək", onları dilimizin kitabi-müqəddəsi sayılan Orfoqrafiya lüğətinə daxil edilməklə sözlərin sayını artırmaq düşüncəsi çox qorxuludur. O nümunələrin arxasından yüzlərlə, bəlkə də minlərlə varvarizm dalğası gəlməkdədir. Həmin sözlərə legitim don geyindirmək, eləcə də təsadüfi nitq faktlarını dil faktına çevirmək istəyi yolverilməzdir”, - deyə Şahlar Göytürk vurğulayıb.

A.Qorxmaz