Azərbaycanın səhiyyə tarixində ilk dəfə meyitdən orqan köçürülməsi əməliyyatları həyata keçirilib. Orqan transplantasiyası Mərkəzi Gömrük Hospitalında və Milli Oftalmologiya Mərkəzində gerçəkləşib.
Bəs əməliyyatlar neçə xəstə üzərində aparılıb, xəstələrə meyitin hansı orqanları köçürülüb? Ümumiyyətlə, hazırda orqanlarını öldükdən sonra bağışlamaq istəyənlər varmı?
Modern.az saytı bu və digər suallara cavab almaq üçün Orqan Donorluğu və Transplantasiyası üzrə Koordinasiya Mərkəzinə müraciət edib.
Mərkəzdən sorğumuza cavab olaraq bildirilib ki, Azərbaycanda orqan transplantasiyası sahəsində atılan addımlar son illər intensivləşib. Meyitdən orqan köçürülməsi tibbi və etik baxımdan ciddi prosedurlarla tənzimlənir və bu prosesin inkişafı üçün geniş maarifləndirmə işləri aparılır.
Mərkəzdən verilən məlumata görə, son iki il ərzində ölümündən sonra orqanlarını bağışlamaq istəyənlərin sayı təxminən 100-ə yaxın olub.
“Müxtəlif xəstəliklər səbəbindən orqan transplantasiyasına ehtiyac duyan insanların sayı kifayət qədər çoxdur. Hər il yüzlərlə insan donor orqanı gözləyir. Orqan Donorluğu və Transplantasiyası üzrə Koordinasiya Mərkəzi (ODTKM) bu sahədə geniş təbliğat işləri aparır. Mərkəzin rəhbərliyi və əməkdaşları könüllü olaraq orqan donorluğu üçün müraciət ediblər ki, bu da cəmiyyətdə nümunəvi addım kimi qiymətləndirilə bilər. Bununla yanaşı, cəmiyyətin bu prosesə baxışı hələ tam formalaşmayıb. Maarifləndirmə tədbirlərinin intensivləşdirilməsi bu sahədə irəliləyişə səbəb ola bilər”, - deyə qurumdan bildirilib.
Qeyd edilib ki, fevralın 24-də həyata keçirilən orqan köçürmə əməliyyatı üç xəstə üzərində aparılıb:
“Bütün əməliyyatlar uğurla həyata keçirilib. Meyitdən götürülmüş qaraciyər Mərkəzi Gömrük Hospitalında, tibb üzrə fəlsəfə doktoru Mircəlal Kazıminin rəhbərlik etdiyi peşəkar tibbi heyət tərəfindən hepatit B və hepatit D-yə görə qaraciyər sirrozundan əziyyət çəkən, canlı donoru olmayan 12.10.2002-ci il təvəllüdlü Şərifova Mənzər Yaşar qızına uğurla köçürülüb.
Gözün buynuz qişası isə Akademik Zərifə Əliyeva adına Milli Oftalmologiya Mərkəzində ixtisaslaşmış cərrah-oftalmoloq, tibb üzrə fəlsəfə doktoru Cəmil Həsənov və peşəkar komanda tərəfindən iki resipiyentə transplantasiya edilib. Onlardan biri Zaqatala, digəri isə Füzuli rayon sakinidir.
Hazırda hər üç pasiyentin vəziyyəti qənaətbəxşdir və mütəxəssislərimizin nəzarəti altındadır”.
Mərkəzin məlumatında qeyd edilib ki, orqanı götürülən meyitlə orqan köçürülən şəxslər arasında heç bir qohumluq əlaqəsi yoxdur:
“Meyit donorun orqanları gözləmə siyahısında olan və tibbi göstərişlərə uyğun gələn şəxslərə köçürülüb. Seçim prosesi ciddi tibbi və etik qaydalara əsaslanır və donor orqanlarının ədalətli şəkildə bölüşdürülməsini təmin etmək üçün xüsusi qaydalar tətbiq edilir”.
Həyata keçrilən orqan transplantasiyası əməliyyatları dövlət vəsaiti hesabına aparılıb. Xəstələrdən əlavə ödəniş tələb olunmayıb.
“Dövlətin bu sahəyə dəstəyi, donor orqanı gözləyən insanların həyatını xilas etməyə yönəlib”, - deyə Mərkəzdən qeyd edilib.
Orqan Donorluğu və Transplantasiyası üzrə Koordinasiya Mərkəzindən onu da deyiblər ki, vəfat edəndən sonra sağlam orqanlarını bağışlamaq istəyən vətəndaşlar bunun üçün həmin quruma müraciət edə bilərlər:
“Ölümündən sonra orqanlarını bağışlamaq istəyən şəxslər Orqan Donorluğu və Transplantasiyası üzrə Koordinasiya Mərkəzinə müraciət etməli və Səhiyyə Nazirliyinin Kollegiyası tərəfindən təsdiq edilmiş ərizə formasını doldurmalıdırlar.
Müraciət ünvanı: Orqan Donorluğu və Transplantasiyası üzrə Koordinasiya Mərkəzi
Ünvan: Nəsib bəy Yusifbəyli küç. 107, G blok, 8-ci mərtəbə
İş günləri: Bazar ertəsi - Cümə; İş saatları: 08:00 - 17:00
Donor olmaq istəyən şəxslər, həmçinin, odtkm.gov.az rəsmi internet səhifəsindəki "Donor ol" bölməsindən qeydiyyatdan keçərək, bu prosesə dəstək ola bilərlər”.
