“Yeni Yasamal” yaşayış kompleksindəki mənzillər üçün güzəştli elektron kabineti yaratmaq, həmçinin, sərfəli şərtlərlə dəyərindən ucuz qiymətə mənzillərin alınmasına köməklik göstərmək adı ilə 26 nəfərə qarşı dələduzluq edən şəxsə hökm oxunub.
Modern.az-ın məlumatına görə, təqsirləndirilən şəxs 26 nəfərə qarşı ümumilikdə 431 min 600 manat dələduzluq edib.
İstintaq zamanı təqsirləndirilən şəxsdən ona məxsus 2 ədəd dəftərçə, Rusiya Federasiyasının “Milli Təhlükəsizlik Akademiyası”na aid 2 ədəd vəsiqə, Ukrayna Respublikasına məxsus 1 ədəd vəsiqə, “Şanlı Azərbaycan Televiziyası Press”ə aid 1 ədəd vəsiqə, “Gürcüstan Azərbaycanlılarının Jurnalistlər Birliyi”nə məxsus 1 ədəd vəsiqə, Fransa Təşkilatına məxsus 2 ədəd diplomatik pasport, “İHRDC-CİPDH”yə aid olan 1 ədəd vəsiqə, Avstriya dövlətinə aid nömrəli 1 ədəd vəsiqə, 2 ədəd CD disk maddi sübut kimi götürülüb.
Bakı Ağır Cinayətlər Məhkəməsi adı açıqlanmayan təqsirləndirilən şəxsin 2 il müddətə dövlət və yerli özünüidarə orqanlarında rəhbər və maddi məsul vəzifə tutmaq hüququndan məhrum edilməklə 8 il müddətə azadlıqdan məhrum edilməsi ilə bağlı qərar çıxarıb.
