“Neftçi” klubunun keçmiş futbolçusu, Əməkdar idman ustası və Prezident təqaüdçüsü İqor Ponomaryovun 65 yaşı tamam olub.

Modern.az xəbər verir ki, AFFA rəhbərliyi veteran futbolçu, Olimpiya çempionu İqor Ponomaryovu 65 illik yubileyi münasibətilə təbrik edib.

Bu münasibətlə veteran futbolçuya xatirə hədiyyəsi təqdim olunub.

İqor Ponomaryov 24 fevral 1960-cı ildə Bakıda doğulub. O, 1978-ci ildən "Neftçi" klubunda oynamağa başlayıb. Futbolçu kimi karyerasının çox hissəsini "Neftçi"də keçirib. SSRİ-nin olimpiya yığmasının tərkibində 1988-ci il Seul olimpiadasında qızıl medal qazanıb. 1982-ci ildə MOİK-in tərkibində hərbi xidmət keçib və 1989-cu ildə İsveçin "Norrçyopinq" klubunda yarım mövsüm oynayıb, onunla ölkə çempionu olub. Ancaq zədə səbəbindən karyerasını vaxtından əvvəl bitirmək məcburiyyətində qalıb. 

İqor Ponomaryov penalti zərbələrini dəqiq yerinə yetirən futbolçu kimi də ad-san qazanıb. O, SSRİ çempionatlarında 34 penaltidən 31-ni dəqiq reallaşdırıb. 

Karyerasını başa vurduqdan sonra İsveçdə yaşayıb. İsveçin kiçik liqa komandalarını çalışdırıb.

Baş məşqçi karyerası ərzində isə o, Azərbaycan yığması, “Qarabağ” və “Xəzər-Lənkəran”, eləcə də Rusiyanın "Maşuk-KMV" komandalarına rəhbərlik edib.

2010-cu ildə Azərbaycan Respublikası Prezidentinin fəxri diplomuna layiq görülüb. 24 fevral 2020-ci il tarixində Azərbaycan Prezidenti İlham Əliyevin sərəncamı ilə Azərbaycan Respublikasında idmanın inkişafında xidmətlərinə görə "Şöhrət" ordeni ilə təltif edilib.

Hazırda 2018-ci ildən bəri Azərbaycanın "Sabah" futbol klubunun Müşahidə Şurasının üzvüdür. 2021-ci ildən həm də "Sabah"ın idman direktoru təyin olunub. 2019-cu ildə və 2024-cü ildə müvəqqəti olaraq klubun baş məşqçisi işləyib.

Onun oğlu Anatoli Ponomaryov da futbolçudur.