Azərbaycanın Futbol üzrə Milli Komandası son qarşılaşmalarda ard-arda məğlubiyyətlərlə üzləşib. Milli komandamız Haiti ilə qarşılaşmada "3:0", Belarusla qarşılaşmasında isə "2:0" hesabı ilə məğlub olub. Bu isə azərbaycanlı azerşkeşləri, futbol həvəskarlarını məyus edib.
Millinin baş məşqçisi Fernando Santuş isə qalib gəlmək üçün komandanın əllərindən gələni etdiyini bildirib.
"Dəfələrlə demişəm. Bəlkə də hamıdan çox üzgünəm. Karyeram boyu bu qədər uduzmamışdım. Öz işimə inanıram, oyunçuların potensialına da inanıram. İstədiyimiz nəticələri əldə edə bilərik", - o, son oyundan sonra bildirib.
Qeyd edək ki, Santuş baş məşqçi təyin edildən sonra Azərbaycan millisi 8 oyun keçirib, onların 7-sində məğlub olub, biri isə qolsuz başa çatıb.
Məhz bu komandanın başçısının istefa edib-etməyəcəyi ilə bağlı məsələni gündəmə gətirib.
Modern.az-a açıqlamasında futbol mütəxəssisi Ağasəlim Mircavadov bildirib ki, iki oyunla məsələ həll olunmur:
"Baş məşqçini dəvət ediblər, onunla kontrakt imzalanıb. Müqavilə 2028-ci ilə qədər etibarlıdır. Deməli, ortada inam var. Bizdə başqa cür yanaşma var, bir-iki oyunla istəyirik ki, məşqçini saxlayaq, ya da çıxaraq. Bu, belə olmur. Məşqçini dəvət edəndə onun hansı uğurlarının olub-olmadığı hərtərəfli müzakirə olunmalıdır. Adlı-sanlı məşqçidir, söz yox. Lakin bizdə adlı-sanlı məşqçilər əvvəllər də olub. Məşqçi əsas olaraq klublarla iş görməlidir. Oyunçular klublardan gəlir. Mən bilmirəm belə olub, ya yox, amma baş məşqçi gələndə klub başçıları ilə toplantı olmalıydı. Deməliydi ki, mən belə oyun oynamaq istəyirəm, xahiş edirəm klublarda oyunçulara fikir bildirmək lazımdı. Avropada ola bilər ki, bu yoxdur. Amma gəlin belə danışaq, biz hələ Avropaya uyğunlaşa bilmirik. Ona görə bizə başqa üsullar da lazımdır. Söhbət bundan gedir. Baş məşqçi klublarla həddindən artıq sıx əlaqədə olmalıdır. Belarus milli komandası ilə qarşılaşmada gənc orta xətt buraxdı oyuna. Ümumiyyətlə, məncə yığmada cavanlaşma söhbəti olmamalıdır. Avropada belə bir şey yoxdur, orada oyunçunun pasportuna yox, oyununa baxırlar. O, yığmanın kriteriyalarına cavab verirsə, dəvət olunur".
A.Mircavadov deyib ki, heyət təkmilləşdirilməlidir: "Son iki oyun qalıb. Heyəti təkmilləşdirməlidirlər. Son oyunlar bu komandalarla oynamaq lazımdır. Sentyabrda çıxacağı heyətlə oynamalıdır".
