“Antiinhisar və İstehlak Bazarına Nəzarət Xidmətinin nümayəndəsi Cavid Süleymanovun “Trendyol”un fəaliyyəti ilə bağlı açıqlamasını oxudum. Bu adam işdən qovulmalıdır, çünki açıqlaması sübut edir ki, nə işlədiyi orqandan, nə onun səlahiyyətlərindən, ən vacibi isə nə də məntiqdən xəbəri var”.

Modern.az-ın məlumatına görə, bunu iqtisadçı ekspet Natiq Cəfərli İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti rəsmisinin Azərbaycanda “Trendyol”a qarşı tədbirlər görə biləcəkləri barədə açıqlamasına münasibət bildirərkən deyib.

N.Cəfərlinin sözlərinə görə, “Antiinhisar fəaliyyəti haqqında” qanunda deyilir ki, bazarda hökmran mövqedə olan şirkətlərlə məşğul olmalıdırlar:

“Qanunun 4-cü maddəsi: “Hökmran mövqe - təsərrüfat subyektinin öz iqtisadi potensialının üstünlüyünə əsaslanaraq rəqabətə həlledici təsir göstərməyə imkan verən və bununla da bazarın digər iştirakçılarının bazara daxil olmasını çətinləşdirən müstəsna vəziyyəti. Bazarda payı 35 faizdən və ya qanunvericiliklə müəyyən olunmuş digər həddən çox olan təsərrüfat subyekti hökmran mövqe tutan hesab olunur”.

Cavid Süleymanov öncə öz işlədiyi orqan haqqında qanunu oxuyub-öyrənməlidir – “Trendyol” bazarda hökmran mövqe tutan şirkət deyil, klassik anlamda pərakəndə satışla məşğul olan şirkət də deyil, Antiinhisar Xidmətinin bu işlə əlaqəsi yoxdur! Hə, işsizlikdən əziyyət çəkirlərsə getsinlər, məsələn, dərman bazarını yoxlasınlar, bu bazarda satış həcminin 50%-nə yaxınına nəzarət edən şirkətlər var.

Cavid Süleymanov daha sonra deyir: “Azərbaycan bazarındakı pərakəndəçilər “Trendyol”dakı qiymətlə rəqabət apara bilmir. Bu vəziyyətdə bir rəqabət orqanı olaraq bizim, ölkədə yerləşən pərakəndə satış məntəqəsini qorumaq öhdəliyimiz var” - Dünyadan bixəbər məmur anlamır ki, onun işi vətəndaşın maraqlarını qorumaqdır, yəni, onlar sevinməlidirlər ki, rəqabət var, online satışla ənənəvi satışın rəqabətindən udan vətəndaşlar var, amma yox, bu məmur rəqabətli mühitdə maraqlı deyil, əksinə rəqabəti baltalamaqda maraqlıdır. Deməli, vətəndaşın marağını deyil, ölkədə Mall-ların sahiblərinin, onların fantastik icarə haqqlarının, məmurlara bağlı iri yerli satış təmsilçilərinin maraqlarını qorumağa çalışır”, - ekspert vurğulayıb.

N.Cəfərli digər bir məsələyə də toxunub:

“Daha bir məsələ odur ki, Türkiyəyə qardaş, dost, strateji müttəfiq deyirlər, amma Türkiyə şirkətləri, məsələn, Rusiyada belə daha rahat işləyə bilirlər – bu da kənardan çox qeyri-səmimi görünür. Həm də, online ticarət dünyada 20 ildir sürətlə inkişaf edir, bu, tək mal satmaq deyil, bu həm də infrastrukturdur, yeni iş yerləridir, informasiya texnologiyaları sektorunun inkişafı, yeni bilikli kadrlar deməkdir. Hökumət isə belə düşünə bilmir, çünki “sovetləşmiş” məntiqlə yanaşırlar, yaşları cavan olanlar da belədir, çünki “sovetləşmə” yaş məsələsi deyil də, baş məsələsidir...”.
 

Xatırladaq ki, ötən gün İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin Haqsız rəqabət və reklam qanunvericiliyinə nəzarət şöbəsinin baş məsləhətçisi Cavid Süleymanov Türkiyə istehsalı olan məhsulların satışı ilə bağlı haqsız rəqabətdən danışıb.

O, Azərbaycanda rəsmi olaraq “Trendyol”a qarşı tədbirlər görə biləcəklərini  açıqlayıb. Qeyd edibki, yerli bazardakı pərakəndəçi şirkətlər "Trendyol"dakı qiymətlə rəqabət apara bilmir.

Məsələ sosial şəbəkələrdə müzakirələrə səbəb olub. Əhalinin xüsusən aztəminatlı təbəqəsinin ən çox alış-veriş etdiyi ticarət şəbəkəsinə ölkədə məhdudiyyət qoyulma ehtimalı tənqid olunub və ciddi narahatlıqla qarşılanıb.