Bitkoinin qiyməti tarixdə ilk dəfə 93 min dolları keçərək bütün zamanların ən yüksək həddini yeniləyib.
Modern.az "Binance"a istinadən xəbər verir ki, kriptovalyutanın qiyməti noyabrın 13-də birjalarda 93 409,02 dollara çatıb. Noyabrın 14-də səhər saatlarında Bitkoin 89 842 dollara qədər ucuzlaşıb.
Ənənəvi bazarların bağlandığı və kriptovalyuta ticarətinin adətən sakit olduğu həftə sonu BTC hətta 5000 dollar qazanıb. Son artım o deməkdir ki, Bitkoin 2024-cü ilin əvvəlindən 93 faiz, 2022-ci ilin noyabrında olan 16 min dollar səviyyəsindən sonra isə 400 faiz artıb.
Bitkoinin qiyməti Donald Trampın ABŞ prezident seçkilərində qalib gəlməsindən sonra bir həftə ərzində 30 faizədək bahalaşıb. "Bloomberg"in məlumatına görə, Amerikanın Bitkoin mübadiləsi fondlarına vəsait axını noyabrın əvvəlində 1 milyard dolları ötüb.
Agentlik yazır ki, Bitkoinin artımına səbəb Trampın ABŞ prezident seçkilərində qələbəsi olub. Tramp rəqəmsal aktivləri fəal şəkildə dəstəklədi və ABŞ-ı “Bitkoin super gücü” edəcəyinə söz verdi.
Bitkoinin artımı, ayrı-ayrı dövlətlərin kriptovalyutada strateji ehtiyatlar yarada biləcəyi gözləntiləri ilə də əlaqələndirilir. Bu baş verərsə, rəqəmsal valyutaya tələbat böyük olacaq.
Analitik Ceyms Çek Bitkoinin yeni qiymət rallisinin ortasında olduğu üçün bazarların indi "eyforiya zonasına" daxil olduğunu söyləyib.
Ekspertlər hesab edir ki, Trampın inaqurasiyasına qədər bitkoinin qiyməti 100 min dollarlıq psixoloji həddi keçəcək. Ümumilikdə gələn il qiymət arımının davam edəcəyi və 200 min dollara çatacağı bildirilir.
"CleanSpark” şirkətinin baş direktoru Zak Bredfordun sözlərinə görə, Bitkoin yaxın 18 ay ərzində təxminən 200 min dollara qədər yüksələ bilər.
Bitkoinin uzun müddətli durğunluq dövründən sonra davamlı yüksəliş olacağını vurğulayan Bradford sözlərinə belə davam edib: "Təbii ki, bunların hamısı makro hadisələrə və digər amillərə tabedir".
