Maliyyə Nazirliyi 2025-ci ilin dövlət və icmal büdcələri ilə bağlı məlumatları özündə birləşdirən “Vətəndaşın büdcə bələdçisi” hazırlayıb.
Bələdçidə dövlət və icmal büdcələrin əsas parametrləri, büdcə layihəsinin hazırlanması prosesində görülmüş işlər, büdcə gəlirlərinin formalaşma mənbələri və xərclərin istiqamətləri barədə əsas məlumatlar əks olunub.
Bəs “Vətəndaşın büdcə bələdçisi” nədir?
Modern.az mövzu ilə bağlı iqtisadçı ekspert Xalid Kərimli ilə həmsöhbət olub.
Onun sözlərinə görə, hökumətin dövlət büdcəsini təsdiqləməsindən sonra əsas məlumatlar bu bələdçidə qeyd olunur:
“Burada dövlət büdcəsi, onun xərcləri və gəlirləri haqqında məlumatlar da əks olunur. Vətəndaşlar dövlət büdcəsinin gəlirlərinin formalaşma mənbələri, xərclərinin funksional və iqtisadi baxımdan bölgüsü, büdcənin hazırlanması zamanı ortaya çıxan digər məsələlərlə bu bələdçi vasitəsilə tanış ola bilərlər. Eyni zamanda büdcənin gəlir və xərclərinə təsir göstərən əsas çağırışlar, qarşıdakı illərdəki əsas prioritetləri və hazırlanma mühiti, makro iqtisadi vəziyyəti ilə bağlı məlumatlar da burada yer alır. Ümumi şəkildə bələdçi dövlət büdcəsinin hazırladığı mühiti sadə və vizual şəkildə izah edir”.
